«Rıeltor» men «Keshikken mahabbat» fılmderi

«Kınoshok-2011» festıvalinen oljaly oraldy Rejısserler Sábıt Qurmanbekov­­­tiń «Keshikken mahabbat» jáne Ádilhan Erjanovtyń «Rıeltor» atty fılmderi Anapada ótken «Kınoshok-2011» festıvalinde qazylar alqasynyń arnaýly júldesin jeńip aldy. Ony bizge «Qazaq­fılm» kınostýdııasynyń baspasóz qyzmeti qýana habarlaǵan. Aıtqandaı, basty rólderdi Jerar Deparde, Natalıa Arynba­sarova, Nurjuman Yqtym­baev, Bolat Qalym­be­tov­ter somdaǵan «Keshikken mahabbat» kartınasy – «Jı­de» dep te atalady. Natalıa Arynbasarova oınaı­tyn keıipkerdiń aty – Jıde. Al Reseıde ótkiziletin «Kınoshok» festıvali 1992 jyldan beri ótkizilip kele jatyr. Búginde ol Reseıdegi eń iri kınofes­tıvalderdiń biri. Bir aıta ketetin jaıt, «Kınoshok-2011» festıvaliniń «Eń úzdik er adam róli» júldesine Nurjuman Yqtymbaev, al «Eń úzdik áıel adam róli» júldesine Natalıa Arynbasarova ıe boldy. Kınofestıvalderdiń tarıhynda bolsyn, kınematografııada bolsyn bul salmaǵy bar marapattar. Áıgili fransýz akteri Jerar Depardeniń qatysýymen túsi­rilgen bul fılm shynynda da júrekke jyly tıetin – tamasha fılm. Keýdesinde jany turǵanda árbir adam óz baqyty úshin kúresýmen, sol baqytty kútýmen ómiri ótedi. Al endi bireý­lerdiń kútpegen jerden armany oryndalyp, baǵy ashylady. «Keshikken mahabbat» dál osyndaı kartına. Fransýz akteri «Egemen Qazaqstanǵa» bergen suhbatynda qazaq kınosyna túsý ózine asa unaǵanyn aıtyp: «Bul fılmde shyndyq pen ómir bar. Fılmdi túsirý barysynda qazaq akterlerine baýyr basyp kettim. Mundaı fılmge qatysý úlken táýekeldi qajet etedi. Sebebi, munda eshqandaı kommersııalyq múdde bolǵan joq. Meni fılmniń adamı jaǵy qyzyqtyrdy», – degen bolatyn. Aınash ESALI. Almaty. ––––––––––––––––– Sýretterde: «Rıeltor» fılminiń rejısseri Ádilhan Erjanov; prodıýsser Serik Ábishev.