Urpaq tárbıesinde ustazdardyń alar orny erekshe. Muǵalim árbir oqýshynyń boıyna jaqsy qasıetterdi sińirýmen qatar, ony bilim nárimen sýsyndatady. «Ustazdyq etken jalyqpas, úıretýden balaǵa» dep uly Abaı aıtyp ketkendeı shákirtiniń bilimdi de alǵyr bolyp qalyptasýy ustazdarǵa baılanysty. Bul turǵydan kelgende Aqmola oblysynda bilim salasynda eńbek etip júrgen 20 myńǵa tarta pedagogtyń ishinde Sáýle Jaqypovanyń ózindik ustanymy bar.
Bilikti pedagog balalardy eshqashan «jaqsy oqıtyndar» nemese «jaman oqıtyndar» dep bólip-jarmaıdy. S.Jaqypovanyń paıymynda balalardyń barlyǵy da talantty, tek der kezinde olardyń qabiletin asha bilý kerek. Sondyqtan da bolar ustazdar qaýymy tańerteńnen qara keshke deıin mektepte júredi. О́ıtkeni árbir balanyń bolashaǵyna alańdaǵan jaqsy muǵalim, oǵan jeke ýaqytyn da arnaıdy. Uly aǵartýshy Ybyraı Altynsarın bylaı degen eken: «Muǵalim bárinen de qymbat, óıtkeni muǵalim – mekteptiń júregi». Al Astrahan aýdanyndaǵy №6 Agrotehnıkalyq kolledj dırektorynyń orynbasary Sáýle Jaqypova oqý ordasynyń júregine aınalǵaly qashan. Ol eshqashan ustazdyq etýden jalyqqan emes. Árbir oqýshynyń boıyndaǵy jigerin oıatyp, onyń ómirdegi óz orny baryna, sondyqtan da izdenis qajettigine sendire alatyn jaqsy qasıetke ıe. Balalardyń boıynda bolashaqqa degen nyq senimdi uıalatqan ulaǵatty ustaz armandardyń oryndalmaı qoımaıtyndyǵyna da sendire biledi. Árbir jetistikke jetý úshin aıanbaı ter tógý qajettigin de eskertýdi nazardan bir sát shyǵarǵan emes.
О́ziniń pedagogıkalyq eńbek jolyn Sáýle Jaqypova 1987 jyly Jańa dala aýdanyna qarasty Chapaev orta mektebinde matematıka pániniń muǵalimdiginen bastady. Biraz jasqa kelgen onyń osy mamandyqty tańdaýy da qyzyqty. 1979 jyldan 1982 jylǵa deıingi aralyqta agronom-esepshi bolyp jumys istep kelgen Sáýle Jaqypova sol jyly pedagogıkalyq bilim beretin joǵary oqý ornyna túsip, matematıka páninen muǵalim bolý týraly armanyn oryndaýǵa kirisip ketedi. Sodan bergi eńbek ótili – 40 jyl. О́ziniń eńbek jolynda ol pedagogtardyń biliktiligin arttyrýda belsendi jumystar atqaryp, muǵalimder sheberlikterin arttyra túsýge qulshynatyn jaǵdaı jasaı bildi. Muǵalimderdiń óz bilimderin tolyqtyra túsýge qulshyndyryp, olardy attestasııadan ótkizý sııaqty mańyzdy mindetterdiń qasynan tabylyp júrgende osy Sáýle Hamıtqyzy. Sol tynymsyz eńbegi úshin de Sáýle Jaqypova Aqmola oblysy ákiminiń qurmet gramotasymen marapattaldy. Sonymen qatar bilim berý men tárbıeleý prosesterin jetildirý jáne birtutas oqytýdy qamtamasyz etý men tárbıeleýdegi jetistikteri úshin «Bilim berý isiniń qurmetti qyzmetkeri» tósbelgisiniń ıegeri atandy.
Asqar TURAPBAIULY, «Egemen Qazaqstan»
Aqmola oblysy