Aınakól aıshyqtary

Aqsý qalasy aýmaǵyna  qa­ras­ty bul aýyldyń áýel bastan-aq joly bolǵandaı. Ertis ózeni­niń jaǵasynda, aınala úlkendi-kishili kólder, úlken joldyń boıy, bir sheti oblys ortalyǵy, kelesi sheti Aqsý qalasy, eki qaladan shyqqan jolaýshylar tasıtyn avtobýstar Aınakólge soqpaı ketpeıdi. Ákimine qarap aýylyn tany. Buryn azamatyna qarap aýylyn tany deýshi edik, qazir ol zamanǵa saı ózgerdi. О́ıt­keni búkil bir aýyldyń ty­nys-tirshiligi  jalǵyz ákimge qarap qaldy. Aýyl ákimi Amanjol  Jabaıuly «Egemenniń» ár sanyn jibermeı, uqypty túrde oqyp otyrady eken. Onysy áń­gime barysynda baıqalyp tur­dy, kózi ashyq, oqyǵan-toqyǵa­ny mol, ár maqalaǵa mán berip, óz pikirin bildirip te qoıady. Negizi osy Aınakól aýyldyq aýma­ǵyna qarasty Syntas, Kóktas, Qaraoı dep atalatyn taǵy  úsh aýyl bar eken. Aqsý  qalasy aý­maǵyna qarasty úlkendi-kishili 33 aýyl bar. Bul kúnderi olarda  28 myńdaı halyq turady.  Aýyl­dar ótken jyly 7,4 mıllıard teńgege aýylsharýashylyq ónimderin, atap aıtqanda, 6 myń tonnadan astam et, 27,5 myń tonna sút, 39 mıllıon dana jumyrtqa óndirse, munyń ishinde Aınakól aýylynyń da úlesi bar ekeni sózsiz. Búgingi kúni aýylda iri qara mal, qoı, jylqy bar, ár aýla­nyń otbasynda qosalqy sharýa­shylyq bar, bul ál-aýqattyń jaqsarǵany. Jármeńke saıyn qala halqyn tamsandyryp et-maı, sút, qaımaǵyn, qurt-irim­shigin ala jóneletin de  osy qa­laǵa jaqyn ornalasqan aýyl­dar. Aqsýdyń ákimi sol úshin qaladan «Aýyl» degen úlken jármeńke ótkizetin bazar ashyp qoıdy. Kelesiń de deldalsyz ónimderińdi sata beresiń. Tur­mys jaqsy. Mal ósirgenniń paıdasy osy. Qazir Jańa jyl aldyndaǵy jármeńkege qyzý daıyndalyp jatyrmyz. О́tken jyly  51 ret jármeńke ótti. Bul – baılyq, molshylyq. Tilimiz tasqa. Tipti, bul bar ǵoı, kádimgi báseke, ár aýyl baryn salyp, jarysqa túskendeı bolady, dep aýyl ákimi  bir kúlip aldy. Aına­kól­diń ózinde negizin  jergilikti ult quraıtyn 171 orys, 92 ýk­raın, 12 nemis, 4 sheshen ulty­nyń ókilderi aǵaıyndas-týys­taı bolyp ketipti. Jumys joq dep eki qoldy qýsyryp otyra­ty­n­daı emes, dál qastarynda tútini býdaqtap Aqsýdyń qos birdeı alyp zaýyty –  biri elektr energııasyn, biri fer­roqo­rytpa óndiredi.  Sodan keıin, taý balasy taýǵa qarap ósedi demekshi, úıiniń aýlasynda oınap júrgen aýyl balasy teh­nıkalyq mamandyq alyp, sol zaýytqa jumysqa túskenshe asyǵady eken. Bizdiń Aınakóldiń sýyndaı taza sý joq shyǵar-aý dep oılaı­myz, KBM  de ornatyp  aldyq, jalpy, aýyl sýdan tarshylyq kórgen emes, deıdi aýyl ákimi bizben áńgimesinde.  Jaz shyǵa aýyldan 8 tabyn mal óriske shy­ǵady. Onymen birge mal sharýashylyǵymen aınalysatyn 16 sharýa qojalyǵy bar. Olar aýyl ishinde bolyp qalatyn ólim-jitimde,  toı-tomalaqta, me­­re­kelerde demeýshilik jasap, kómektesip otyrady. Mine, kúz de keledi. Qysqa daıyndyq. Kádimgi naýqan. Tirshilik degen osy.  Aýyldyń et-sút, maıy jetedi. Dastarqan  mol. Zeınetaqyny ýaqytynda alady. Kómirlerin, otyn-sýla­ryn  daıyndap aýyl halqy qys­qa áldeqashan ázirlenip alǵan. Burynǵydaı bireýge masyl bo­lyp, ókimet  jasap beredi degen joq, árkim óz tynys-tirshiligi úshin, bala-shaǵasynyń qamy úshin eńbek etýde. Oblysta qa­byldanǵan «Jaılaý» baǵdarla­masy arqyly aýyl turǵyny  Baqtybaı Qasymhanov 100 qoı alyp, áıeli, balalary bári ba­ǵyp, tórt túlik mal basyn kó­beıtýge úles qosýda. Balyǵyn aýlaımyn, demalamyn dese  – ózen-kól qasymyzda. О́tken jyl­ǵa ókpe joq. Aýyl kósheleri qoqystan tazartyldy,  qorshaý­lary jóndeldi, shamdar orna­tyldy. “Jol kartasy” baǵdarlama­synyń kezinde aýyldyń kireberis joldaryna jóndeý júrgi­zildi. Kóktas aýylyndaǵy bas­taýysh mektepke telefon baıla­n­ysy ornatylyp,  ınternetke qosyldy. Aınakóldiń ózinde 20 balaǵa arnalǵan shaǵyn ortalyq ashyldy. Aýyldyq dárigerlik am­býlatorııa avtokólikpen qam­tamasyz etildi, endi Syntasqa, Kóktasqa, Qaraoıǵa barýǵa múm­kindik týdy, telefondan­dyryl­dy, jas mamandar keldi. Oblys ákiminiń tapsyrmasyna oraı dá­ri­hana ashyldy, dárigerlik  bó­lim­she, mádenıet úıi, mektep bári de qysqa daıyn, jóndeý júrgizilipti. Bıyl 7 ana «Kúmis Alqa», «Altyn alqa» ıegerleri atanypty. Shoqannyń dosy        G.Potanınniń atyn alyp turǵan aýyl mektebine kelgenimizde tań­qaldyq, jaınap, jarqyrap tur, uqypty qoldardyń, tártip pen júıeliliktiń bary baı­qalady. Mektep dırektory Mu­rat Aıdarbekovtiń ózi   aldy­myz­dan shyqty. Keń de jaryq sport zalda aýyl balalary jattyǵýda. Dırektordyń ózi  sportshy, sondyqtan aýyl bala­lary da sportqa jaqyn kóri­nedi. Murat pen Amanjol sııaqty jigit aǵalarynyń jáne mádenıet úıiniń dırektory Svetlana Baımanqulova apaı­dyń týǵan aýyldarynyń  tirligin óz qoldaryna alǵandary, onyń bolashaǵy úshin, kórkeıýi úshin janashyrlyqpen qyzmet jasap júrgenderine rıza bolyp, Aınakóldeı atyna zaty saı aýyldarymyz kóbeıe bersin dep tiledik. Farıda BYQAI. Pavlodar oblysy.