Túrkistandaǵy «Kaspıı bank» ǵımaratynan aqsha urlaǵan urylar ustaldy.
Oqıǵa bylaı bolǵan eken. Túngi ýaqytta Táýke xan kóshesiniń boıynda ornalasqan bank ǵımaratyndaǵy termınaldan belgisiz bireýler 4 mln teńgege jýyq qarjyny urlap ketedi. Oqıǵa ornyna jetken polıseıler osy fakti boıynsha Qylmystyq kodekstiń 188-baby «Urlyq» 4-bóligimen is qozǵaǵan bolatyn. Jedel izdestirý nátıjesinde osy qylmysqa qatysy bar degen eki kúdikti ustalady.
Qyzyq bolǵanda bank qyzmetkerleri eki kúdiktiniń birin jazbaı tanyǵan. Dál tanıtyn sebebi, kúdiktiniń biri bolyp turǵan 1970 jylǵy jigit urylardyń jolyn kesý úshin kúzetshilik jumysqa qabyldanǵan óz qyzmetkeri edi. «Kaspıı banktiń» kúzetshisi óz qyzmetin shatastyryp aldy ma, álde osy bankke meniń de mańdaı terim artyǵyraq tógildi dep oılady ma, sybaılasymen túngi jortýylǵa shyqqan.
Alaıda, jaza basqanyn ańdaǵan ol tergeýshilerge kinásin tez moıyndap, ózine «tıesili» 2 mln teńgeni qaıtaryp bergen. Al elektrshi bolyp isteıtin serigi qaıtarý jaǵyn oıǵa almapty. Ol dereý qamaýǵa alyndy. Kúzetshi ızolıatorǵa qamalmaǵanymen qylmystyq isten qutyla almady. Endi ekeýi sot úkimin kútedi.
Baqtııar TAIJAN, «Egemen Qazaqstan»
Ońtústik Qazaqstan oblysy