«Mádenıetimizdiń qanshalyqty ilgeri basqanyn nemese keri ketkenin kórsetip otyratyn qatesiz ólsheýishtiń biri – kitaphana» deıdi Mirjaqyp Dýlatuly. Jastarymyz boıyndaǵy otansúıgishtik, ultjandylyq, ádeptilik, tózimdilik syndy qasıetterdi arttyrý jolynda rýhanı qundylyqtardyń mańyzy zor ekeni, al rýhanı qundylyqtardyń qaınar kózi – kitaphanalar ekeni belgili. Elimiz rýhanı ordalarynyń qazirgi qory tek ózimizge tıesili keshegi jáne búgingi tarıhymyzǵa ǵana emes, kúlli adamzatqa ortaq qundy muralarǵa toly ekeni bizdi aýzyn aıǵa bilegen alpaýyt memleketter aldynda da erek ete túsetini anyq.
Elbasymyz N.Nazarbaevtyń keńinen qoldaýǵa ıe bolǵan jalpyulttyq Rýhanı jańǵyrý bastamasy óz elimizde ǵana emes, ózge elderde de rýhanı qundylyqtarymyzdy tanyta bilýge mindettemek. Osy oraıda, Elbasynyń «Bolashaqqa baǵdar - rýhanı jańǵyrý» maqalasynyń aıasynda QR Ulttyq kitaphanasy ujymynyń Qytaıdyń Beıjiń, Sıan qalalarynyń basty kitaphanalarynda issaparlyq kezdesýler ótkizip kelýdegi basty maqsaty – Qazaq eliniń rýhanı qundylyqtaryn keńinen nasıhattaý, eki el arasyndaǵy yntymaqtastyq qarym-qatynasty nyǵaıta túsý, mádenı murasy mol tarıhymyzdy áspetteý, kitaphana salasynyń álemdik deńgeıdegi bilikti mamandarymen tájirıbe almasý, elimizdiń mádenı kelbetine aınalǵan qundy kitaptarymyzdy kitaphana kókjıegi arqyly álemdik arenada kórsetý, sondaı-aq, eki el kitaphanalary arasyndaǵy kelisimshartqa qol qoıý bolǵan edi. Issapar júktegen úmit údeden shyqqandaı.
QR Ulttyq kitaphanasy men Qytaıdyń iri kitaphanalary basshylary qol qoıysqan kelisimsharttardaǵy: kitaphana salasyn meńgerip kele jatqan óskeleń urpaqtyń shet elde oqyp, bilimderin jetildirýge múmkindik jasaý; bilikti mamandardy tárbıelep shyǵarý; qazaq aqyn-jazýshylarynyń kitaptaryn shet elde nasıhattaý; sırek kezdesetin kitaptar men qoljazbalardy tolyǵymen óz qorymyzǵa qaıtarý syndy basty mindetterdiń tolyqtaı júzege asýy aldaǵy kúnderdiń enshisinde degenmen, naqty sheshimderin taýyp qaıtqany aqıqat.
Elbasy N.Á. Nazarbaev óz Joldaýynda: «Biz Qazaqstannyń barlyq azamattarynyń otanshyldyq sezimi men óz eline degen súıispenshiligin damytýǵa tıispiz», – dep atap ótkenin este tuta otyryp, ár azamat, ár ujym atqarǵan ıgi istiń óz Otanyna, halqyna tıgizer paıdasy, eldiń rýhanı jańǵyrý jolyna qosqan súbeli úlesterdiń biri ekeni haq.
Qazaqstan Respýblıkasy Ulttyq kitaphanasy delegasııasynyń bolashaǵy bekem bul bastamasyn Qytaıdaı alyp elge «Rýhanı jańǵyrýymyzdy» jan-jaqty nasıhattaı otyryp, bolashaq urpaqtyń qajetti bilim nárimen sýsyndaý jolynda jasalyp jatqan zor múmkindikterge óz tarapynan qosqan úlesi desek artyq aıtpaǵan bolarmyz. Árdaıym bolashaǵy bekem bastamanyń baǵdarly jasyl shamynda jolǵa shyǵýdy násip etsin deıik!
Aıan JOLDASOV,
QR Ulttyq kitaphanasynyń qyzmetkeri
ALMATY