Búgin Parlament Májilisiniń jalpy otyrysynda Palata birqatar Zań jobalaryn jumysqa alyp, Jer qoınaýy jáne jer qoınaýyn paıdalaný týraly» Kodeks jobasyn ilespe túzetýlerimen, sondaı-aq, Aqparat jáne kommýnıkasııalar máseleleri boıynsha ózgerister men tolyqtyrýlar engizý týraly Zań jobasyn birinshi oqylymda maquldady.
Otyrysta Jer qoınaýy jáne jer qoınaýyn paıdalaný týraly Kodeksiniń jobasyn (birinshi oqylym) ilespe túzetýlerimen Investısııalar jáne damý mınıstri Jeńis Qasymbek baıandady.
Mınıstrdiń málimdeýinshe Kodeks jobasy – jer qoınaýyn paıdalanýshylardyń jumysynda kezdesetin kedergilerdi joıyp, salanyń quqyqtyq bazasyn jetildirýge, halyqaralyq standarttarǵa ótýge jáne ınvestısııalyq klımatty jaqsartyp, salaǵa tikeleı sheteldik ınvestısııalar tartýǵa baǵyttalǵan. Búgingi tańda 104 eldiń ishinde Qazaqstan geologııa salasyn memlekettik retteý boıynsha tek 74-shi orynda tur. Al, jer qoınaýynyń geologııalyq tartymdylyǵy jaǵynan 45-shi orynda. Bul reforma álemde bolyp jatqan daǵdarys pen onyń saldarynan ınvestor tartýǵa baılanysty básekelestiktiń artýynan týyndap otyr.
Ult jospary baǵdarlamasynyń qadamdaryn iske asyrý maqsatynda ázirlengen osy Kodeks jobasy boıynsha depýtattardan, turaqty Komıtetterden jáne Májilistiń zańnama bóliminen kelip túsken 600-den astam eskertýler men usynystar qaralyp, talqylanǵan.