Keshe VI shaqyrylymdaǵy Almaty qalasy máslıhatynyń sessııasy barysynda megapolıs turǵyndarynyń kóptegen usynystaryn eskere kelip jáne qalalyq onomastıka komıssııasynyń, Qazaqstan Úkimeti janyndaǵy Respýblıkalyq onomastıka komıssııasynyń kelisimimen Almatynyń basty kósheleriniń birine Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń esimin berý týraly sheshim qabyldandy.
Sessııa barysynda Almaty ákimi onomastıkalyq komıssııaǵa qaıtalanatyn 112 kósheniń ataýlaryn ózgertý týraly zııaly qaýym ókilderinen, ÚEU-dan, qala turǵyndary men ásirese jastardan megapolıstiń basty kósheleriniń biri Fýrmanov kóshesine Elbasy esimin berý jóninde kóptegen usynystar túskenin atap ótti.
«Biz bıyl Astananyń 20 jyldyǵyn merekeleımiz. Eger eske alatyn bolsaq, tarıhtyń ózi astanany kóshirý týraly Elbasy sheshiminiń barynsha kóregendi ári durys ekenin dáleldedi. Sonyń arqasynda Eýrazııa ortalyǵynda jańa zamanaýı qala paıda boldy ári elimizdiń iskerlik ortalyǵy retinde Almaty jańa serpinmen damı bastady. Tarıhı mańyzy zor sheshim men Prezıdenttiń ekonomıkalyq reformalary ózara ushtasyp, jeke bastamalardy yntalandyrdy, kásipkerlik rýhty damytty. Búgingi kúni Almaty – óńirlik tartylys kúshi, Ortalyq Azııanyń iri megapolısi», dedi Baýyrjan Baıbek.
Qala ákimi Memleket basshysy Almaty qalasynda Konstıtýsııa, Ulttyq valıýta, Qarýly Kúshter jasaǵyn qurý, memlekettik rámizderdi bekitý, Semeı polıgonyn jabý sııaqty talaı tarıhı sheshimderdi qabyldaǵanyn eske alyp, bul usynystyń jaıdan-jaı jasalmaǵanyn aıtty.
«Elbasy abyroıynyń arqasynda Qazaqstan halyqaralyq daǵdarystardy sheshýde basty ról atqaratyn elge, senimdi serikteske aınaldy. Ol kisi álemdik dárejede ıadrolyq qarýdan bas tartýǵa usynys jasaǵan, álemdi ıadrolyq qarýdan aryltýǵa úles qosqan birden-bir tulǵa. Men áriptesterimniń pikirine qosylamyn. Búgingi Fýrmanov kóshesiniń ataýyn berý týraly sheshim der kezinde ári durys qabyldanǵan sheshim», dedi ákim. Elbasy atyna Almatydaǵy úlken dańǵyldyń berilgeni týraly sheshimdi qoǵam qaıratkerleri men zııaly qaýym ókilderi jappaı qoldap otyr. Qoǵam qaıratkeri Myrzataı Joldasbekov bul habardy estigende qatty qýanǵanyn aıtyp, óz oıymen bólisti.
«Keshegi Keńes zamanynda qazaq tarıhyna, qazaq halqyna, Qazaqstanǵa eshqandaı qatysy joq adamdardyń aty qalaǵa da, dalaǵa da, kósheler men mekemelerge de berildi. Biz keshe tarıhymyz, ar-ojdanymyz taptalǵan elmiz. Qazaq handary, bıleri keleke, mazaqqa aınalǵan zamandy da basymyzdan keshtik. Nursultan Nazarbaev babalar amanatyn oryndaǵan, armanyn júzege asyrǵan úlken qaıratker. Ol qırandydan memleket ornatty. Ony álemge tanytty, moıyndatty. Nazarbaev basqaryp otyrǵan Qazaqstandaı táýelsiz memleket Uly Dalanyń tósinde bolǵan emes. Almaty mádenı, ekonomıkalyq ortalyqqa aınaldy. Al Astana Qazaqstandy órge súıredi. Osyndaı tarıhı sheshimdi erlikpen qabyldaǵan da Elbasy bolatyn. Nursultan Nazarbaev maqtaýǵa da, maqtanýǵa da tatıtyn uly tulǵa. Sondyqtan Almatynyń úlken bir kúre tamyry sııaqty dańǵyly Nursultan Nazarbaevtyń atymen atalǵanyna shyn júrekten qýanyshtymyn», deıdi M.Joldasbekov.
Memleket basshysynyń esimi eldiń mádenı astanasyna aınalǵan Almatydaǵy kóshege berilgenin halyq ártisi Bıbigúl Tólegenova da qýana quptap otyr. Ánshiniń aıtýynsha, Elbasyna ózi túlep ushqan Almatydan kóshe atynyń berilýiniń mańyzy zor. «Elbasynyń basqa eńbekterin bylaı qoıǵanda, mádenıetimizdiń búgingideı deńgeıde damýyna qosqan úlesi erekshe. Sondyqtan mádenıettiń astanasy, ejelgi qala Almatydaǵy kóshege Elbasy esiminiń berilýi óte quptarlyq sheshim», dedi B.Tólegenova.
Eske salar bolsaq, osydan 10 jyl buryn Qazaqstan Prezıdenti N.Á.Nazarbaevtyń esimi Iordanııanyń Amman qalasyndaǵy jáne Cheshen Respýblıkasynyń Groznyı qalasyndaǵy kóshelerdiń birine berilgen bolatyn. Bulardan ózge, Qazaqstannyń Tuńǵysh Prezıdentiniń esimimen Túrkııanyń birneshe qalalarynyń kósheleri atalady, Tatarstan astanasy Qazannyń magıstraldy kóshesine Elbasy esimi berilgen.
Maıgúl SULTAN, «Egemen Qazaqstan»