«Nur Otan» partııasynyń ortalyq apparatynda Qazaqstan Respýblıkasynyń Tuńǵysh Prezıdenti kúnine oraı partııaǵa qabyldaý rásimi ótti. Onda partııa Tóraǵasynyń birinshi orynbasary Muhtar Qul-Muhammed óz salasynda bıik belesterdi baǵyndyrǵan talantty jas qazaqstandyqtarǵa partııalyq bıletterin saltanatty jaǵdaıda tapsyrdy.
«Nur Otan» partııasy Tóraǵasynyń birinshi orynbasary Elbasymyzdyń jastardy únemi qoldap, olardyń sapaly bilim alýyna jáne básekege qabiletti maman bolyp qalyptasýyna barlyq jaǵdaıdy jasap kele jatqanyna nazar aýdardy. Sondaı-aq ol táýelsiz Qazaqstannyń shırek ǵasyrda jetken jetistikteri men búkil álem tańdaı qaqqan tabystary Tuńǵysh Prezıdentimizdiń ereń eńbeginiń nátıjesi ekenin aıryqsha atap ótti.
– «Nur Otan» – Elbasynyń partııasy. Sondyqtan Memleket basshysynyń saıasatyn qoldaıtyn, elin, jerin súıetin, halqyna adal qyzmet etkisi keletin árbir jas qazaqstandyq osy partııanyń qatarynan tabylýy kerek. Elbasy salǵan dańǵyl joldan jańylmaı jahan kóshiniń aldynan kóriný endi el jastarynyń, ıaǵnı sizderdiń abyroıly mindetterińiz, – dedi Muhtar Qul-Muhammed.
Sonymen qatar partııa Tóraǵasynyń birinshi orynbasary talantty jastardyń dál Tuńǵysh Prezıdent kúni qarsańynda partııa múshesi atanýynyń mańyzy zor ekenine toqtalyp ótti.
– Dál 1 jeltoqsan kúni búkil halyq bolyp ózimizdiń Tuńǵysh Prezıdentimizdi saıladyq. Sodan beri Elbasymyz bizdi bıik belester men jarqyn jeńisterge batyl bastap keledi. Sondyqtan bul kún barsha qazaqstandyqtar úshin jalpyulttyq mereke. Osyndaı tarıhı kún qarsańynda Elbasy partııasyna ótýdi jańa shyńdarǵa bastaıtyn qadam dep bilemin, – degen Muhtar Qul-Muhammed jastarǵa aldaǵy ómirde tek sáttilik tiledi. Partııa múshesi atanǵan jastardyń qatarynda belgili ánshi, aıtysker aqyn Tóreǵalı Tóreáli de bar. Jıynǵa qatysýshylardy Tuńǵysh Prezıdent kúnimen quttyqtaǵan ol «Nur Otan» partııasynyń múshesi ataný zor mártebe ári úlken jaýapkershilik ekenin aıtty.
О́z kezeginde birneshe hıt ánderdiń oryndaýshysy Erke Esmahan partııa qataryna ótýi týǵan kúnimen tuspa-tus kelgenin aıtyp, ony jaqsylyqqa jorıtynyn jetkizdi.
– Qazaqstan táýelsizdik jyldarynda óner salasynda tamasha jetistikterge qol jetkizdi. Biz sııaqty jas ánshiler úshin de sapaly jumys isteýge barlyq jaǵdaı jasaldy. Munyń bári Elbasymyzdyń jastarǵa degen qamqorlyǵy men qoldaýynyń oń nátıjesi, – deıdi E.Esmahan.
Bulardan bólek osy kúni sportta el namysyn abyroımen qorǵap júrgen jas azamattar da partııalyq bıletterin aldy. Atap aıtqanda, aýyr atletıkadan Rıo-de-Janeıro Olımpıadasynyń qola júldegeri Karına Gorıcheva men kásipqoı bokstan álemniń eks-chempıony Janat Jaqııanov jas nurotandyqtardyń qataryn tolyqtyrdy.
Sondaı-aq ǵylym salasynda orasan zor tabystarǵa qol jetkizgen jas ǵalym, «Tehnıka men tehnologııanyń damýyna qosqan úlesi úshin» N.Tesla atyndaǵy altyn medalmen, ǵylymdaǵy asa zor tabystary úshin Eýropalyq Ǵylym akademııasy prezıdıýmynyń Leıbnıs atyndaǵy medalimen marapattalǵan Áýeshan Ospanov, arheologııada ónimdi eńbek etip júrgen jas maman Aıbar Qasenalın, respýblıkalyq psıhıatrııa, psıhoterapııa jáne narkologııa ǵylymı-praktıkalyq ortalyǵynyń dárigeri Alýa Masalımova, Aqtóbe oblysy, Alǵa aýdandyq balalar úıi dırektorynyń orynbasary Veronıka Vlasova, «Aýyl sharýashylyǵy salasyndaǵy eń úzdik jas maman» baıqaýynyń jeńimpazy Egemen Jumaǵalı, respýblıkalyq jáne halyqaralyq debat týrnırleriniń birneshe dúrkin júldegeri Ýálıhan Turarbek, jas kásipker Nurlan Qabyshtaev, «Dıplommen – aýylǵa!» baǵdarlamasynyń qatysýshysy Ahmet Magomedov, «Bolashaq» baǵdarlamasynyń stıpendıaty Jalǵas Moljigit, jas shahter Nıkolaı Aleınıkov jáne jas metallýrg Dmıtrıı Bobylev «Nur Otan» partııasynyń múshesi atandy.
Is-shara sońynda partııa Tóraǵasynyń birinshi orynbasary Muhtar Qul-Muhammed barsha qazaqstandyqtardy Tuńǵysh Prezıdent kúnimen quttyqtap, jańadan qabyldanǵan jas partııa músheleri Elbasy bastamalarynyń tabysty júzege asýyna óz úlesterin qosatynyna senim bildirdi.
Joldybaı BAZAR, «Egemen Qazaqstan»