Qurlyqtyq hokkeı lıgasynyń kezekti oıynynda elordalyq "Barys" óz aıdynynda magnıtogorlyq "Metallýrgpen" kezdesip, utylyp qaldy.
Osyǵan deıin bizdiń komanda syrtta súreńsiz bes kezdesý ótkizip, upaısyz qaıtqan. Endi mine, Evgenıı Koreshkov shəkirtteri qatarynan 7-shi ret jeńilip otyr. Kezdesýdiń alǵashqy mınýtynda shaıba soǵyp, "Barys" alǵa shyqqan. Artynsha qonaqtar qorǵaýshylarymyzdyń qatelikterin paıdalanyp esepti teńestirdi. Bizdiń jigitterge es jıǵyzbaı "Metallýrg" qaqpashymyzdy taǵy qapy qaldyrdy. Ekinshi kezeńde komandamyz túk bitire almady. Esesine qonaqtar esepti eseleı tústi. Eki shaıba jiberip alǵan jigitterimiz jigerlik tanyta almady. Sheshýshi kezeńde elordalyqtar esep aıyrmasyn qysqartqanymen, teńestirýge kúshteri jetpedi. Aıdyn ıelerinen kezdesýde Talǵat Jaılaýov, Artem Lıhotnıkov, Lınden Veıler kózge tústi. Qonaqtar komandasynan shaıbalardy Denıs Kazıonov, Denıs Kokarev jəne Vladıslav Kaletnıkter soqty. Qorytyndy esep 3-4.
"Barystyń" bar bilgeninen jańylyp júrgenin buryn da jazǵanbyz. Bizdiń komandaǵa kóz tıdi me? Jeńissiz serııa qashanǵa deıin jalǵasady? "Metallýrgty" utpasaq, sonda qaı komandany utamyz?
Joq, magnıtogorlyq komandany osal qarsylas deı almaımyz. Byltyr fınalǵa deıin jetken myqty ujym. Bıyl birneshe negizgi quramnyń oıynshylarynan aıyrylǵan "Metallýrg" qarsylastaryn əýpirimdep utyp júr. Shaıbany sheber soǵatyn shabýylshy Danıs Zarıpov "Ak Barsqa" aýysty. Tasqamal qorǵaýshylar Vıktor Antıpın men Krıs Lı muhıt asyp ketken. Basqalar basym túsip júrgen magnıtogorlyq qomandaǵa "Barystyń" shamasy kelmegeni shambaıymyzǵa batady.
"Barys" kelesi kezdesýin 5-shi jeltoqsan kúni "Traktormen" (Chelıabi) ótkizedi. Endi Evgenıı Koreshkov komandasy jeńiske jetpese, pleı-off kezeńine shyǵýy qıyndaı túsedi.
Erkebulan Jomart "Egemen Qazaqstan"