Úkimet Qaýlysymen oqý ornynyń mártebesin ózgertý týraly sheshim qabyldandy.
Jaqsy jańalyqty oqytýshylar men ǵalymdar keńesiniń keńeıtilgen otyrysynda oqý ornynyń rektory Altynbek Nýhuly habarlady. Jańa mártebesin alý qurmetine arnalǵan qýanyshty kúnge pedagogıka salasynyń ardagerleri shaqyryldy.
- Bizdiń oqý orny úshin bul uzaq kútken jáne baǵa jetpes marapat. Bul mártebe endi úlken múmkindikterge jol ashady. Aldaǵy ýaqytta magıstratýra jáne doktorantýranyń birneshe mamandyqtaryn ashamyz, - deıdi ýnıversıtet rektory.
Bolashaqta ýnıversıtet óńirden shyqqan aqyn Sábıt Dónentaev, uly qaıratker Musa Shormanov, Qanysh Sátbaevtyń aǵasy Ábikeı Sátbaev sııaqty ǵulamalardyń biriniń esimimen atalýy da múmkin. Ýnıversıtet aldynda qazaq jeriniń aǵartýshylary Musa Shormanov pen Ábikeı Sátbaevqa bıýst ornatylǵan.
Oblys ortalyǵyndaǵy pedagogıkalyq ınstıtýt (PPI) 1962 jyldyń 1 jeltoqsanynda ashyldy. Osy jyldar ishinde júzdegen maman pedagogtardy daıyndap keledi. Elimizdiń básekege qabiletti bolashaq mamandardy daıarlaýǵa endi ýnıversıtet mártebesin alýy da múmkindik beredi.
Qazir oqý ornynda 4500- stýdent bilim alýda. Bıyl 1700 stýdent oqýǵa qabyldanyp, onyń ishinde 700-i grant aldy. Elimizdegi «Serpin» baǵdarlamasy júzege asyrylýda.Sondaı-aq, ýnıversıtet quramynan kolledj ashý da josparlanýda. Altynbek Nuhulynyń aıtýynsha, «Mektepke deıingi jáne orta bilim berý máselesine» arnalǵan barlyq oblys dırektorlarynyń qatysýymen ótetin alǵashqy aımaqtyq pedagogıkalyq forým naýryz aıynda ótedi.
Farıda Byqaı,
«Egemen Qazaqstan».
Pavlodar