Májilis jáne Senat depýtattary óńirlerde halyqpen kezdesýde.
Parlament Májilisi Tóraǵasynyń orynbasary Gúlmıra Isımbaeva, Májilistiń Áleýmettik-mádenı damý komıtetiniń tóraǵasy Gúlnar Iqsanova jáne Májilis depýtaty Serik Seıdýmanov Almaty qalalyq kardıologııa ortalyǵynyń jumysymen tanysty.
Elimizdegi eń irgeli aýrýhanalardyń biri sanalatyn atalǵan ortalyqta ótken jyldyń ózinde júrekke 600-den astam ashyq operasııa jasalǵan. Kezdesý barysynda depýtattar Parlament Májilisiniń qyzmeti týraly áńgimelep, memlekettik jáne úkimettik baǵdarlamalardyń, mindetti áleýmettik medısınalyq saqtandyrýdyń, sondaı-aq júıeli reformalardy jalǵastyrýdyń mańyzdylyǵyna toqtaldy. Medısına qyzmetkerleri óz kezeginde densaýlyq saqtaý salasyndaǵy aqparattyq júıelerge, sıfrlandyrýdy engizýge, kardıologııalyq qyzmettegi aqparattyq júıelerdiń jaı-kúıine jáne halyqty dári-dármekpen qamtamasyz etýge qatysty saýaldaryn qoıdy.
Arman OKTIаBR, «Egemen Qazaqstan»
ALMATY
Parlament Senatynyń depýtattary Manap Kóbenov pen Nurjan Nursıpatov Pavlodar oblysynda boldy. Senatorlarǵa Aqsý ferroqorytpa zaýytynda metallýrgter jumysynyń nátıjeleri kórsetildi.
Sondaı-aq depýtattar Evgenev aýyldyq okrýginde ótken jyly paıdalanýǵa berilgen birqatar áleýmettik nysandarda boldy. Senatorlar sýmen jabdyqtaý jelisimen tanysyp, qurylysyna 160 mıllıon teńge jumsalǵan deneshynyqtyrý-saýyqtyrý keshenin aralady.
Saparlaryn qorytyndylaǵan senatorlar aımaqtyń áleýmettik damýyndaǵy tabystar men aýyl sharýashylyǵy salasyn kóterýdegi jergilikti kásipkerler men sharýa qojalyqtarynyń zor úlesterin atap ótti. Depýtattar júzdesý barysynda otandyq ónim óndirýshilerdi qoldaýǵa qatysty aıtylǵan usynystar zań shyǵarý jumystary barysynda eskeriletinin aıtty.
Farıda BYQAI, «Egemen Qazaqstan»
PAVLODAR
Bizdiń saparymyzdyń basty maqsaty – el-jurtpen júzdesip, áleýmettiń jaı-kúıi men tynys-tirshiligi jóninde jan-jaqty pikir alysý, dedi Aqtóbedegi kezdesýleri kezinde Parlament Májilisiniń depýtattary Gleb Shegelskıı men Danııa Espaeva.
Sondaı-aq olar aýyl sharýashylyǵyna qatysty máselelerdi de kóterip, bul baǵyttaǵy memlekettik baǵdarlamalardyń tıimdiligin arttyrý qajettiligine toqtaldy. Al depýtat Quralaı Qaraken áleýmettik sıpattaǵy jaılarǵa basymdyq berse, Sergeı Sımonov depýtattardyń zań shyǵarýshylyq qyzmetindegi keıbir jaılarǵa toqtala kelip, bul iste el múddesi qaı kezde de birinshi orynda turatynyn málimdedi. Onyń oıynsha buǵan kópshiliktiń oı-pikirleri men usynystary basty negiz bolmaq.
Temir QUSAIYN, «Egemen Qazaqstan»
AQTО́BE
Parlament Senatynyń depýtaty Rysqalı Ábdikerov Qaraǵandy qalasynda azamattardy qabyldady. Senatormen kezdesýge ártúrli áleýmettik máseleler tolǵandyrǵan oblys ortalyǵynyń turǵyndary keldi.
«Qorǵaý» ardagerler keńesiniń múshesi V. Chaıka qabyldaý kezinde qala men oblysty damytýdaǵy aǵa býyn ókilderiniń róli týraly aıta kelip, olardyń jastar tárbıesine atsalysýy kerektigi týraly óz oıyn ortaǵa saldy. Jalpy alǵanda, depýtatqa 11 azamat qabyldaýǵa kelip, eki shaǵym boıynsha oń sheshim qabyldandy. Qabyldanǵan 5 shaǵym tıisti mekemelerge jiberildi. Sondaı-aq 4 azamatty tolǵandyrǵan máseleler boıynsha tıisti túsindirý jumystary júzege asyryldy.
Mıras ASAN, «Egemen Qazaqstan»
Qaraǵandy
Ońtústik Qazaqstan oblysynyń ákimi Janseıit Túımebaev jumys saparymen kelgen Parlament Májilisiniń depýtattarymen kezdesti. Olardyń qatarynda Ýálıhan Qaınazarov, Berik Ospanov, Sapar Ahmetov jáne Fahrıddın Qarataev bar.
Kezdesýde oblystyń áleýmettik-ekonomıkalyq damýy men alda atqarylatyn jumystar sóz boldy. – Elbasynyń bastamasymen qolǵa alynǵan memlekettik baǵdarlamalar óńirde belsendi túrde júzege asyp keledi, – dedi oblys ákimi.
О́z kezeginde Májilis depýtattary da óz oılaryn ortaǵa salyp, saparlary barysynda Prezıdenttiń saıasatyn nasıhattap, aldaǵy jyldary atqarylatyn jumystardy júıeleýdi jón kórip otyrǵandaryn aıtty.
Budan soń halyq qalaýlylary birqatar aýdandardy aralap, jurtshylyqpen kezdesti.
Baqtııar TAIJAN, «Egemen Qazaqstan»
Ońtústik Qazaqstan oblysy