Dúnıetanymy tereń, kóripkeldigi keremet, jaratylysy bólek jan esebinde elge tanylǵan Ospanqoja 1862 jyly týyp, 1928 jyly 66 jasynda dúnıeden ozǵan.
Jýyrda Ospanqoja óz turmysynda kádege jaratqan aǵash tabaq tabyldy. Bul týraly Ospanqoja shóberesi Shoqan Ǵazezuly qajy sheshile syr shertti. Onyń aıtýynsha áıgili áýlıeniń Ámirhan, Muhammedýálı, Hamza atty úsh balasy bolypty. 1937 jyly saıası qýǵyn-súrginge ushyraýyna baılanysty Hamza Ospanov bolyp jazylǵan. Ortanshy uly Muhammedýálı Beket ata esimine jazylǵan. Muhammedýálıde perzent bolmaǵandyqtan, Ámirhannyń Ǵazezi oǵan Maırash esimdi qyzyn bergen.
Muhammedýálı Ekinshi dúnıejúzilik soǵysqa qatysyp, jaralanǵan. Din jolyn ustap, Táýish aýylynda ımam bolǵan. 1984 jyly 78 jasynda baqılyq bolǵan Muhammedýálıdiń úıinde áýlıe Ospanqoja qoldanǵan aǵash tabaq bolypty. Aqsaqal dúnıeden ozar aldynda tabaqty úlken qyzy Maırashqa qaldyrypty. Byltyr shilde aıynyń aıaǵynda Qostanaı qalasy mańyndaǵy aýylda turatyn Maırash ta aýyr syrqattan jaryq dúnıemen qosh aıtysty. Birinshi beısenbi shaıynda jınalǵan qaýym taǵylymy mol kórinistiń kýágeri boldy. Maırashtyń uly Arman, kelini Qyzǵaldaq aǵash tabaqty aq dastarqanǵa orap ákelip turyp:
– Anamyz osy tabaqtyń Ospanqoja nemeresi, din jolyndaǵy baýyry Shoqannyń úıinde jaqsy yrym retinde qalǵanyn qalady, – dedi erli-zaıyptylar qatarlasa sóılep. Bul oqıǵaǵa Shoqan qajy da, onyń zaıyby Salıha da erekshe tebirendi. Shoqan Ǵazezulynyń shańyraǵynda jýyrda meıman bola otyryp biz de ǵajaıyp áserge bólendik. Qansha degenmen ǵasyrdan astam saqtalǵan aǵash tabaq qoı. Qazir túrli úlgide tabaq jasaıtyn qolóner sheberleri barshylyq. Tipti kásipke aınalyp ketti. Biraq solardyń kóbi eskiniń kózi bolǵan tabaqtardy aýystyra almaıtyndaı. Bálkim, búkil qasıeti, myqtylyǵy tańdap alynǵan aǵashynda shyǵar. Eń bastysy, halyqqa qadirmendi tulǵanyń tutynǵan dúnıesinde ǵoı.
Naǵashybaı MUQATOV
Qostanaı