Jolyńyz túsip Hashımjan Qurbanovtyń sheberhanasyna bara qalsańyz talaı dúnıege tánti bolasyz. Ol – maıly boıaý, grafıka, jıvopıs sııaqty kórkemónerdiń qaı salasynda bolsyn óz qoltańbasyn qaldyrǵan jan. Ásirese, sheberdiń qolynan shyqqan kádimgi qabaqtan jasalǵan túrli týyndylary kimdi bolsyn tańqaldyrmaı qoımaıdy.
Bos ýaqytynyń bárin óziniń shaǵyn sheberhanasynda ótkizetin talant ıesi shyǵarmashylyqpen aınalysqanda janynyń rahat tabatynyn aıtady. Dál osy qabaqtan jasalǵan tabaqtar men qasyqtar, mýzykalyq aspaptar men turmysta tutynatyn túrli buıymdar sheberhananyń shyraıyn ashyp tur. Osy ónerdiń arqasynda 2010 jyly jaryq kórgen «Qazaqtyń rekordtar kitabyna» myń qabaqtan jasalǵan erekshe týyndysymen engen ol – osyndaı eńbeginiń birin Elbasy Nursultan Nazarbaevqa syıǵa tartypty.
Sheberdiń aıtýynsha, tómengi synypta oqyp júrgeninde salǵan biraz sýretterin ákesi Asym Qurbanov aýyldasy Ábilhan Qasteevke aparyp kórsetken eken. Sonda dańqty sýretshi balanyń salǵan sýretterine uzaq qarap turyp: «Ulyń osy joldy tastamasyn, úlken sýretshi bolady» dep rızashylyǵyn bildiripti. «Uly sýretshiniń ákeme aıtqan osy bir amanaty búkil ónerim men ómirime qýat boldy. Araǵa elý jyl salyp Ábilhan Qasteev atyndaǵy altyn medalmen marapattalǵanymda, osy sóz oıyma oralyp kózime eriksiz jas keldi», deıdi ol.
«Jibek Joly shoqjuldyzy», «Meniń atamnyń kóshesi», «Qashqardaǵy saýdager», «Tomırıs» sııaqty birqatar shyǵarmalary Sýretshiler odaǵynda jylyna eki ret ótetin dástúrli kórmede kórermen nazaryna usynylyp júr. Máselen, «Jibek Joly shoqjuldyzy» týyndysy túrki jurtynyń san ǵasyrlyq tarıhynan syr shertedi. Onda túbi bir túrkiniń tanymal tulǵalary, túrkilerdiń nanym-senimderi men ańyz-dastandardaǵy kóne zamandardyń kórinisi beınelengen. Osyndaı kólemdi týyndyny jasaý úshin jylǵa jýyq ýaqyt ketedi eken. Bári de shyǵarmashylyq kóńil kúı men shabytqa baılanysty.
– О́ner eshqashan tapsyryspen týmaıdy. Onyń bar qudireti sonda. Tapsyryspen jasalǵan shyǵarmadan jasandylyq baıqalyp turady. Búkil bolmysyńmen sezinbeı, óne boıyńnan ótkizbeı jasaǵan isiń dittegen jerinen shyqpaıdy. Esh boıamasyz, ómirdiń ózinen alynǵan shyǵarmalar ǵana ómirsheń bolady. Osy ýaqytqa deıin ár túrli pishindegi qabaqtardan myńdaǵan estelik buıymdar jasadym. Qabaq erteden-aq uıǵyr halqy úshin, jalpy túrkiler úshin qasterli sanalǵan. Ol tabıǵattyń bizge bergen syıy, – deıdi Qazaqstannyń eńbek sińirgen qaıratkeri Hashımjan Qurbanov.
Arman OKTIаBR, «Egemen Qazaqstan»
ALMATY
Sýretterdi túsirgen avtor