Qazaq ulttyq agrarlyq ýnıversıtetinde Memleket basshysy Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan Halqyna Joldaýyn talqylaý jıyny ótti.
Joldaýda aıqyndalǵan maqsat-mindetter saralanǵan basqosýǵa Almaty qalasy ákimdigi, Joǵarǵy oqý oryndarynyń basshylary men ǵylymı-zertteý ınstıtýttarynyń mamandary, sondaı-aq atalǵan ýnıversıtettiń professorlyq-oqytýshylar quramy qatysty.
Joldaýda agroóndiris keshenine jalpy agrarlyq sektorǵa úlken basymdyq berilgenin eskersek, bul baǵytty damytý el ekonomıkasynyń negizgi qýaty ekenin anyq túsinemiz. Ǵalymdar aýylsharýashylyq ónimderin ulǵaıtý men olardyń sapasyn arttyrý negizgi talap ekenin aıta kele, ony iske asyrý úshin aýylsharýashylyǵyn damytýdaǵy jekelegen jumystarǵa serpin berý kerek degenge toqtaldy. Ol úshin básekege qabiletti mamandar daıyndaý qashanda birinshi kezekte turatyny, eksportqa qabiletti aýyl sharýashylyǵy óniminiń kólemin eselep ulǵaıtý kerektigi basa aıtyldy. «Bizdiń agrarlyq sektorda jalpy shıkizattyń kólemi júz paıyz dep alatyn bolsaq, eksportqa shyǵatyn ónimniń kólemi 17-20 paıyzdy ǵana qurap otyr. Qaıta óńdeıtin jańa ónimder qýattylyǵy 25-30 paıyz ǵana. Joldaýda naqty aıtylǵan aqyldy tehnologııa, resýrsty únemdeıtin quraldar, sandyq tehnologııalar bul salany damytýǵa kóp septigin tıgizbek» deıdi Qazaq Ulttyq agrarlyq ýnıversıtetiniń rektory Tilektes Espolov.
Jıyn barysynda ǵalymdar 2015 jyly ýnıversıtette qurylǵan Halyqaralyq Agrotehnologııalyq hab sheteldik ýnıversıtettermen ǵylymı baılanys ornatýǵa zor múmkindik ashqanyn jáne Elbasy aıqyndap bergen mindetterdi iske asyrýda ýnıversıtet ujymy tabandy túrde jumys isteıtinin aıtty. Ol úshin agroónerkásip kesheniniń barlyq salalaryna ınnovasııalyq tehnologııalardy engizý, olardy óndiriste keńinen paıdalaný máseleleriniń mańyzdy ekeni sóz boldy.
Arman OKTIаBR,
«Egemen Qazaqstan»
ALMATY