Endi www.egov.kz saıtyna tirkelgen ata-analarǵa dúnıege sábı kelýimen quttyqtaǵan SMS-habarlama keledi. Bóbegińiz perzenthanadan shyqpaı turyp avtomatty túrde tirkelip, tipti kýáligi de daıyn bolady. Jyl basynan beri elimiz boıynsha alty myńǵa jýyq ana osyndaı sms-quttyqtaý alǵan. Al alǵashqylardyń biri bolyp proaktıvti ádispen kýálik ıelengender arasynda atyraýlyq Baǵyt Álı Tilekqabyluly men Maqsym Omar Nurbekuly da bar.
Oblystyq perınataldyq ortalyqta dúnıege Omar esimdi ul ákelgen jas ana Jaıdar Ibatollaqyzy: «Qaǵazbastylyqty kóbeıtpeı, jedel, avtomatty túrde rásimdeletin kýáliktiń alǵashqy ıegerleriniń qatarynda bolǵanymyzǵa qýanyshtymyz», - deıdi.
«Azamattarǵa arnalǵan úkimet» memlekettik korporasııasy «Ulttyq aqparattyq tehnologııalar» aksıonerlik qoǵamynyń proaktıvti ádisi aıasynda bastaý alǵan pılottyq jobanyń artyqshylyǵy kóp. Oblystyq halyqqa qyzmet kórsetý ortalyǵy departamentiniń dırektory Turlan Nurjanov buryn jańa týǵan balany tirkeý, kýáligin alý, járdemaqy taǵaıyndaý, balabaqsha kezegine turý syndy sharalar halyqqa qyzmet kórsetý ortalyqtarynda júzege asqanyn aıtady. Endi ata-ana QHKO-ǵa balanyń kýáligin alyp ketý úshin ǵana barady nemese úıge jetkizý qyzmetin paıdala alady. Barlyq qajetti qyzmetterdi SMS-habarlama arqyly alýǵa bolady. Ol úshin kez-kelgen halyqqa qyzmet kórsetý ortalyqtaryna baryp, telefon nómirlerin portaldaǵy jeke kabınetterinde bekitýi kerek.
Baqytgúl Babash,
"Egemen Qazaqstan"
ATYRAÝ.