Senatorlar Rashıt Ákimov pen Dáýren Ádilbekov Aqmola oblysyndaǵy Shortandy aýdanyna jumys babyndaǵy sapary aıasynda «Polımer-Plast» jaýapkershiligi shekteýli seriktestiginiń óndiristik qýatymen tanysty, dep habarlaıdy Májilistiń baspasóz qyzmeti.
Kásiporyn 2014 jyldan beri 400 mıllıon teńge bolatyn myńdaǵan tonna polıetılen ónimderin óndirdi. Osy zamanǵy jabdyqtar qoıylǵan sehtardyń arqasynda munda qaldyqsyz ónim shyǵarylady. Qaldyq shıkizattan qoqys salynatyn qaptar shyǵarý jolǵa qoıylǵan.
R. Ákimov pen D.Ádilbekov aýdan aktıvimen bolǵan keńeste Prezıdent N.Á. Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda alǵa qoıylǵan negizgi mindetterge toqtaldy. Senatorlar sondaı-aq, Parlamenttiń ótken jylǵy jumysynyń qorytyndylary men zańnamadaǵy ózgerister týraly tanystyrdy.
Cenator D.Ádilbekovtiń Selınograd aýdanynda bolǵan kezdesýlerinde de Memleket basshysynyń Qazaqstan halqyna Joldaýyn talqylaý negizgi taqyryp boldy. Depýtat áleýmettik dúken jumysymen tanysý barysynda múmkindigi shekteýli adamdardy eńbekke ornalastyrýdaǵy jumystaryn joǵary baǵalady. Parlamentshi sondaı-aq «Capital Projects Ltd» jáne «Eco Park Astana» kásiporyndarynda da boldy.
Ákimdiktiń qyzmetkerlerimen, máslıhat depýtattarymen, kásiporyndar men sharýa qojalyqtarynyń basshylarymen kezdesýlerde senator salyq zańnamasyna engizilgen ózgerister týraly áńgimeledi. D. Ádilbekov bıylǵy jyldan bastap patent negizindegi arnaıy salyq tártibin qoldanatyn kásipkerler úshin salyq mólsheri 2 paıyzdan 1 paıyzǵa deıin azaıtylyp, áleýmettik salyq joıylatynyn atap ótti.
Aýyl sharýashylyǵyn damytýdyń keleshegi egjeı-tegjeıli talqylandy. «Sapaly ónim óndirý maqsatynda agroónerkásip salasyndaǵy ǵylymǵa erekshe nazar aýdarý kerek. Sondaı-aq eń aldymen sapasymen erekshelenetin ózimizdiń ulttyq brend jasaý asa mańyzdy», dedi D.Ádilbekov.