Prezıdent Qasym-Jomart Toqaev ǵylymdy damytý jáne jas zertteýshilerdi qoldaý saıasaty aıasynda Ǵylym qyzmetkerleri kúnine oraı 10 jas ǵalymǵa páter kiltterin tabystady. Turǵyn úıler Almaty men Astana qalalarynan óteýsiz negizde berildi, dep habarlaıdy Egemen.kz.
Qazirgi ýaqytta Almatydan baspana alǵan jas ǵalymdar jańa, tolyq jabdyqtalǵan páterlerge qonystanyp úlgerdi. Olar memleket tarapynan jasalǵan qolaıly jaǵdaı ǵylymı jumysqa erkin kóńil bólýge múmkindik beretinin aıtyp, óz rızashylyqtaryn bildirdi.
Saltanatty marapattaý rásiminde Memleket basshysy ǵylymnyń eldiń básekege qabilettiligin arttyryp, halyqaralyq bedelin nyǵaıtatyn negizgi faktor ekenin atap ótti. Onyń aıtýynsha, ǵylym men bilimge ınvestısııa salǵan memleketter álemdik deńgeıde aldyńǵy qatardan kórinedi. Sonymen qatar Prezıdent otandyq ǵylymnyń bolashaǵy jańa ıdeıalar usynatyn, el damýyna serpin beretin jas ári daryndy zertteýshilerdiń qolynda ekenin aıtty.
Memleket basshysy belgili ǵalymdardy marapattady
Qazirgi tańda jalpy sany 600-den astam jas ǵalym turǵyn úımen qamtamasyz etilgen. Budan bólek, olarǵa ǵylymı granttar beriledi jáne álemniń jetekshi ǵylymı ortalyqtarynda taǵylymdamadan ótý múmkindigi qarastyrylǵan.
Jańa páter ıeleriniń qatarynda elimizdiń túrli jetekshi ǵylymı uıymdarynyń ókilderi bar.
Ǵ.Dáýkeev atyndaǵy Almaty energetıka jáne baılanys ýnıversıteti oqytýshysy, PhD Madına Qumarǵazına energııa tıimdiligi men jańartylatyn energııa kózderin zertteý baǵytynda eńbek etedi. Ol Scopus bazasynda jarııalanǵan eńbekterdiń avtory jáne birneshe patenttiń teń avtory.
Sonymen qatar Q.I. Sátbaev atyndaǵy Qazaq ulttyq tehnıkalyq zertteý ýnıversıteti qyzmetkeri Arman О́mirzaqov energetıka salasyndaǵy zertteýlermen aınalysady. Onyń ǵylymı eńbekteri halyqaralyq jýrnaldarda jarııalanyp, birqatar patentterge ıe bolǵan.
Qazaqstanda ǵalymdardyń tabysy qandaı?
Al Fılosofııa, saıasattaný jáne dintaný ınstıtýty ǵalymy Shyryn Tilenshıeva memlekettik qoldaýdyń ǵylymdy damytýdaǵy rólin atap ótip, jeke baspananyń jas zertteýshilerge úlken motıvasııa beretinin jetkizdi.
Shyryn Muratqyzynyń ǵylymı eńbek ótili 13 jyl, ol Scopus jáne Web of Science bazalaryna engen jarııalanymdardy qosa alǵanda 9 ǵylymı maqalanyń avtory, oqý quralynyń teń avtory jáne avtorlyq quqyq ıegeri. Ǵalym halyqaralyq jáne ulttyq ǵylymı jobalarǵa, sonyń ishinde «Jas ǵalym» baǵdarlamasy aıasynda qatysqan. Sonymen qatar ol International Society for Quality-of-Life Studies uıymynyń bilim berý grantynyń ıegeri jáne 2021-2025 jyldary osy uıymnyń múshesi boldy.
Prezıdent bastamasymen júzege asyrylyp jatqan bul baǵdarlama jas ǵalymdardy qoldaýdyń mańyzdy bóligi bolyp qala bermek jáne eldiń ǵylymı áleýetin arttyrýǵa yqpal etedi.