Shymkentte Premer-mınıstrdiń orynbasary – Mádenıet jáne aqparat mınıstri Aıda Balaevanyń tóraǵalyǵymen Mádenıet jáne óner ýnıversıtetin qurý máseleleri jóninde keńes ótti. Joba Memleket basshysy Qasym-Jomart Toqaevtyń megapolıske jumys sapary barysynda Mádenıet jáne aqparat mınıstrligi men Shymkent qalasynyń ákimdigine bergen tapsyrmasymen júzege asyrylmaq.
Keńes jumysyna qala ákimi Ǵabıt Syzdyqbekov, Mádenıet jáne aqparat mınıstrligi, jergilikti atqarýshy organdar, merdiger uıymdardyń ókilderi, sondaı-aq M.Áýezov atyndaǵy Ońtústik Qazaqstan zertteý ýnıversıtetiniń basshylyǵy qatysty.
Jıyn barysynda Aıda Balaeva qatysýshylardyń aýqymdy jobany iske asyrý barysy jónindegi baıandamalaryn tyńdady.
Jańa joǵary oqý orny M.Áýezov atyndaǵy Ońtústik Qazaqstan zertteý ýnıversıtetiniń Mádenıet jáne óner fakýltetiniń bazasynda qurylady. Josparǵa sáıkes oqý ornynda 6 fakýltet, 17 kafedra jáne bakalavrıat, magıstratýra men doktorantýra boıynsha 46 bilim berý baǵdarlamasy jumys isteıdi. Negizgi basymdyq kıno jáne televıdenıe, anımasııa, medıa-menedjment, sıfrlyq dızaın, ssenografııa jáne ózge de baǵyttar boıynsha tehnıkalyq kadrlar daıarlaýǵa beriledi.
Sonymen qatar Qazaqstanda alǵash ret sırk óneri salasynda joǵary bilimdi mamandar daıarlaý josparlanyp otyr. Restavratorlar daıarlaý da jańa baǵyttardyń biri bolmaq.
Kezdesýde Shymkent qalasynda jańa Opera jáne balet teatryn salý máselesi de qaraldy. Bul nysanǵa qala ákimdigi jalpy aýmaǵy 2,8 gektar bolatyn jer ýchaskesin belgilep qoıǵan. Jobaǵa sáıkes teatrdyń kórermen zaly 1500 orynǵa laıyqtalyp salynady.
Qazirgi ýaqytta qalada 1984 jyly salynǵan, 330 kórermenge arnalǵan Opera jáne balet teatry jumys istep tur.