Keıingi ýaqytta kúre joldy qoıyp, qala kóshelerinde jarys uıymdastyratyn ospadar júrgizýshiler kóbeıdi. Osyndaı essizderdiń kesirinen talaı adam jazataıym ajal qushyp, talaı otbasy qaıǵy jamyldy. Qara jol ústindegi osyndaı keleńsizdiktiń aldyn alyp, júrgizýshilerdiń jaýapkershiligin arttyrý maqsatynda Abaı oblysy ákimdigi óńirlik tártip saqshylarynyń qyzmettik kóligin kóbeıtti.
Resmı derekke sáıkes, byltyr elimizde 36 myń jol-kólik oqıǵasy bolǵan. Saldarynan 51 myń adam jaraqat alyp, 2330-2331 adam qaza tapqan. Mundaı adam shyǵyny tipti soǵys jaǵdaıynda da tirkele bermeıdi. Soraqysy sol, bul kórsetkish jyl saıyn kóbeımese, azaımaı otyr. Sondyqtan jol qaýipsizdik sharalaryn kúsheıtý kún tártibinen túspek emes. Osy rette, Abaı oblysy polısııa departamenti mamandaryna qyzmettik avtokólikterdiń kilti tapsyryldy. Is-sharaǵa oblys ákimi Berik Ýálı, polısııa departamentiniń bastyǵy Eldar Danııarov qatysty.
Byltyr jergilikti atqarýshy organdar tarapynan polısııa departamentiniń materıaldyq-tehnıkalyq bazasyn nyǵaıtýǵa, arnaıy tehnıkalyq quraldar satyp alýǵa tıisti qarajat bólingen. Sol jumystyń jalǵasy retinde bıyl polısııa qyzmetine KIA «Cerato», «Elantra», JAC, «Cobalt» markili 137 jańa avtokólik berildi. Kólikterdiń arasynda 8 avtobýs bar.
Saltanatty is-sharada óńir basshysy tabystalǵan tehnıkalar polısııa qyzmetin jańǵyrtý, qyzmetkerlerge qolaıly jaǵdaı jasaý, jol qaýipsizdigi baǵytyndaǵy keshendi jumystyń bir bóligi ekenin aıtty.
«Memleket basshysy Qasym-Jomart Toqaev «Ádildik ıdeıasy ústemdik qurǵan qoǵamda polısııa qyzmetkerlerine joǵary talap qoıylyp, zor jaýapkershilik júkteledi. Árbir tártip saqshysynyń qyzmetin minsiz atqaryp, bilikti maman, otanshyl azamat bolýy óte mańyzdy», dep ózderińizdiń tabandy eńbekterińizdi erekshe atap ótti. Polısııanyń qyzmetin qoldaý, olardyń materıaldyq-tehnıkalyq bazasyn únemi jetildirip, jańartyp otyrý – zaman talaby. Osyny eskere otyryp, búgin oblys ákimdigi polısııa departamentine 137 qyzmettik avtokólikti tapsyryp otyr. Bul – tek materıaldyq-tehnıkalyq bazany jańartý ǵana emes, sonymen qatar qoǵamdyq qaýipsizdikti kúsheıtýge, polısııa jumysynyń jedeldigin jáne tıimdiligin arttyrýǵa baǵyttalǵan qadam», dedi oblys ákimi.
Ákimniń sózinshe, óńirde quqyq qorǵaý organdaryn materıaldyq-tehnıkalyq turǵyda nyǵaıtý baǵytynda júıeli jumys júrgizilip keledi. Nátıjesinde, bıylǵy úsh aıda ótken jyldyń sáıkes kezeńimen salystyrǵanda quqyqbuzýshylyq sany 18 paıyzǵa tómendedi. Qoǵamdyq oryndarda jasalǵan quqyqbuzýshylyq 246-dan 184-ke azaıdy.
«Qazirgi jaǵdaıda jedel áreket etý, jaqsy jabdyqtalý jáne úılesimdi jumys isteý – azamattardyń quqyqtaryn qorǵaýdyń negizgi kepili. Jańa tehnıkalar tıimdi paıdalanylyp, jumystyń sapasyn arttyryp, óńir qaýipsizdigine qyzmet etýi kerek. Sonymen qatar oblys ákimdigi aldaǵy ýaqytta oblys ortalyǵy men aýdandarda jedel basqarý ortalyqtaryn salýǵa, radıostansalar men qosymsha avtokólikter alýǵa qarajat bólýdi josparlap otyr. Búgingideı kóp mólsherdegi kólik oblys tarıhynda tártip saqshylaryna berilgen emes. Biz munymen shektelmeı, aldaǵy ýaqytta polısııa departamentiniń avtoparkin jańalaı beretin bolamyz», dedi Berik Ýálı.
Kóshede qyzmettik kólik kóbeıgennen keleńsizdik sap tyıylady deý qıyn, árıne. О́ıtkeni jol qaýipsizdigi tek tártip saqshylarynyń emes, ár júrgizýshiniń jaýapkershiligi men jeke mádenıetine qatysty másele.
Abaı oblysy