Almatyda D. Qonaev atyndaǵy ýnıversıtettiń jataqhanasynda bolǵan oqıǵa áleýmettik jelide qyzý talqylanyp jatyr. 17 jastaǵy stýdent qyzdyń aıtýynsha, janjal jataqhanadaǵy tazalyqty saqtaý týraly eskertýden bastalyp, sońy tóbleske ulasqan, dep habarlaıdy Egemen.kz.
Jábirlenýshiniń jazýynsha, oǵan birneshe adam kúsh qoldanǵan.
«Meni qylǵyndyryp, basymdy qabyrǵaǵa soǵyp, temir kereýetke urdy. Shashymnan súırep, syrtqa shyǵýǵa múmkindik bermedi. Janymdaǵy adamdar jaı qarap turdy. Keıbiri vıdeoǵa túsirip, esikti jaýyp turdy», dep jazdy ol áleýmettik jelide.
Oqıǵadan keıin qyz jedel járdemmen aýrýhanaǵa jetkizilgen. Dárigerler oǵan jabyq bas-mı jaraqaty, gematomalar jáne qan ketý dıagnozyn qoıǵan. Is boıynsha sot sheshimi shyǵyp, qatysýshylardyń biri kináli dep tanylyp, qoǵamdyq jumystarǵa tartylǵan.
Qaraǵandydaǵy jataqhanada 21 jastaǵy sheteldik stýdent kóz jumdy
Almaty qalasynyń prokýratýrasy oqıǵany «janjaldyń tóbeleske ulasýy» dep sıpattap, eki tarapqa qatysty sotqa deıingi tergeý bastalǵanyn málimdedi.
«Bir materıal boıynsha sot sheshimi shyǵyp, Abaı oblysynyń týmasy kináli dep tanylyp, qoǵamdyq jumystarǵa tartyldy. Ekinshi materıal boıynsha Atyraý oblysynan kelgen stýdentke qatysty tergeý jalǵasýda», delingen prokýratýra habarlamasynda.
Eske sala keteıik, buǵan deıin Qyzylorda medısına kolledjiniń 1-kýrs stýdentin jataqhanada uryp óltirgenin jazǵan edik.