Prezıdent Qasym-Jomart Toqaevqa elordanyń áleýmettik-ekonomıkalyq jáne ınfraqurylymdyq damýy týraly málimet berildi, dep habarlaıdy Egemen.kz.
Elorda ákimi qalada barlyq basty ekonomıkalyq kórsetkishter boıynsha oń qarqyn baıqalatynyn jetkizdi.
«Bıylǵy tórt aıda negizgi kapıtalǵa salynǵan ınvestısııa kólemi 588 mıllıard teńgeni qurady. Bul byltyrǵy osy kezeńmen salystyrǵanda 9,1 paıyz joǵary. Olardyń arasynda óńdeý ónerkásibi, bilim, medısına, kólik, saýda, logıstıka salalaryna qatysty jobalar bar. Búginde Astana LRT jeńil relsti kólik jelisi tolyq jumys istep tur. Elordanyń qoǵamdyq kólik júıesin jandandyrý maqsatynda jobanyń ekinshi kezeńi pysyqtalyp jatyr», dedi qala ákimi.
Jeńis Qasymbek áleýmettik nysandardyń qurylysy, turǵyn úı alaptaryn kórkeıtý jóninde aıtty.
«Sońǵy jyldary Astanada 44 mektep salynǵan. Al jańa oqý jylynda 12 bilim oshaǵy ashylady. Sonymen qatar 2 oqýshylar saraıyn jáne 6 balabaqshany el ıgiligine berý josparlanyp otyr. 2028 jylǵa deıin 2 perınataldy ortalyq, kópbeıindi aýrýhana jáne dıagnostıkalyq keshenniń qurylysy aıaqtalmaq», dedi Jeńis Qasymbek.
Qala ákimi elordanyń ınjenerlik-kommýnaldyq ınfraqurylymy, Smart City jobasynyń iske asyrylýy týraly baıandady. Bıyl 173 aýla men qoǵamdyq keńistikti abattandyrý, 1,1 mıllıon túp jasyl jelek egý kózdelgen.
Kezdesý sońynda Memleket basshysy Astana ákimi Jeńis Qasymbektiń qyzmetin oń baǵalap, elordany odan ári damytýǵa qatysty birqatar tapsyrma berdi.