Qasıetti Ertis-Baıan óńiriniń rýhanı ordasy ispetti J.Aımaýytov atyndaǵy Pavlodar oblystyq qazaq mýzyka-drama teatrynyń bıylǵy gastroldik sapary Taldyqorǵan óńirinen bastaý alǵan edi. Osy óner sapary 8-10 sáýir kúnderi Almaty qalasynda jalǵasty.
Aımaqtyq teatrdyń óner tábárigin ala kelgen trýppanyń sapary megapolıstiń mádenı ómirinde aıshyqty oqıǵaǵa aınaldy. Atalǵan teatrdyń Almatydaǵy gastroli balalarǵa arnalǵan «Aladdın» ertegisimen shymyldyǵyn (avtory: B.Sholpanqul) ashty. S.Levıskııdiń «Djýdıt jasaǵan qıyn tańdaý» atty balalar men eresekterge arnalǵan spektakl-shoýy, Jangeldi Sadyqov qoıǵan «Alǵashqy mahabbat» komedııasy, Azamat Nyǵmanovtyń «Ujdan» ápsanasy (avtory: Sh.Qudaıberdiuly) men rejısser Juldyzbek Jumanbaı qoıǵan «Balam, qashan kelesiń?..» dramasy (avtory: S.Sybanbaı) úsh kún boıy kórermendi erekshe áserge bóledi.
– Osynaý gastroldik sapar sonaý shalǵaıda jatqan Ertis-Baıan óńirindegi teatrdyń ózindik esep berýi men repertýar tanystyrýy desek te bolady. Kórermender barlyq qoıylymdy jaqsy qabyldady. Gastroldik sapar kóńilimizden shyqty. Kórermen qoshemetine bólendik. Birqatar respýblıkalyq, halyqaralyq teatr festıvaliniń talaı júldesin jeńip alǵan «Ujdan» qoıylymy men jýyrda sahnalanǵan «Balam, qashan kelesiń?..» dramasyna bıletter aldyn ala túgel satylyp ketkendikten, «Balam, qashan kelesiń?..» qoıylymyn qaıtalap qoıýǵa týra keldi, – deıdi «Aladdın» ertegisiniń rejısseri ári teatrdyń akteri Baýyrjan Manatbekuly.
ALMATY