Ulttyq mýzeıde belgili jazýshy, halyqaralyq «Alash» ádebı syılyǵynyń laýreaty, «Parasat» ordeniniń ıegeri Qýanysh Jıenbaıdyń «Jer ústinde de jumaq bar» atty kitabynyń tusaýkeseri ótti.
Ár qalamgerdiń jan dúnıesine jaqyn óz taqyryby, óziniń aıqyn qoltańbasy, adam psıhologııasyndaǵy astań-kesteń arpalysty sezimderdi maıdan qyl sýyrǵandaı asa dáldikpen sýretteıtin sheberligi bolady desek, Qýanysh Jıenbaı osy pikirimizge tolyqtaı dálel bola alatyn prozashy. Búginge deıin onnan astam kitaptary jaryq kórip, oqyrman qaýymnan óz baǵasyn alyp úlgergen qalamger.
«Jer ústinde de jumaq bar» romanynda Baıqońyr ǵarysh aılaǵy men Qorqyt baba kesenesi arasyndaǵy «Qudaıdyń nazary túsken» qasıetti topyraqtyń búgini men keleshegi, onyń aspan dúnıesimen baılanysty, bolashaqta álemdik deńgeıde tyńǵylyqty zertteýdi qajet etetin kıeli meken bolatyndyǵy jan-jaqty sýrettelgen. Keıipkerleri dara. Shyǵarma kótergen máseleniń aýqymdylyǵymen de, tylsym-qupııalyǵymen de qyzyqty.
Al, jınaqqa engen áńgimeleriniń deni sońǵy kezderi jazylǵan. Jazýshy zamandastarynyń alýan túrli minez qaıshylyqtaryn kórkem tilmen ashyp bergen. Jáne sol zamandastarynyń beıneleri arqyly jalpy qoǵam psıhologııasy men zaman beınesin sheber beıneleıdi.
«Jer ústinde de jumaq bar» Baıqońyr óńiri týraly, sol aımaqtaǵy adamdardyń taǵdyry týraly shyǵarma. Qalamger bul romanynda ózi ómir súretin ortany jaqsy sýrettep qana qoımaı, materıaldy tolyq ıgergen dep aıtar edik. Tóretam, Baıqońyr óńiriniń ekologııalyq jaǵdaıy men adamdardyń rýhanı ekologııalyq máselesin qatar alyp sýretteıdi. «Án salýǵa áli erte» degen buryn jazǵan romanynda da Aral, Qazaly jeriniń qasireti men qasıeti týraly osylaı sheber sýrettegen bolatyn. Shyǵarma shyn máninde óz qyzmetin tolyq atqaratyn dárejege jetken», dedi jazýshy Qajyǵalı Muqambetqalı.
Tusaýkeser rásimin satırık Kópen Ámirbek júrgizdi. Tusaýkeserge Memlekettik syılyqtyń laýreattary, jazýshylar Ánes Saraı men Qajyǵalı Muqambetqalı sondaı-aq qalamdas-áriptesteri Erjuman Smaıyl, Qaısar Álim, Súleımen Mámet, Jarylqap Beısenbaıuly, Baýyrjan Omarov, synshy Amangeldi Keńshilikuly, Ulttyq mýzeı dırektorynyń orynbasary Jáken Taımaǵambetov jáne oqyrman qaýym qatysty.
Baǵashar TURSYNBAIULY, «Egemen Qazaqstan»