Qazaqstan Respýblıkasy Ulttyq kitaphanasynda Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýyn talqylaýǵa arnalǵan jıyn ótti.
Ulttyq kitaphana ujymy Joldaýda aıqyndalǵan mindetterdi qyzý talqylap, qoldaý kórsetti. Kitaphana basshysy Janat Seıdýmanov Elbasy Joldaýy basymdyqtaryn aıta otyryp «Adamı kapıtal – jańǵyrý negizi» tarmaǵyna erekshe toqtalyp ótti.
– Adamı kapıtaldyń jańǵyrýy kitaphana isimen tikeleı baılanysty. О́ıtkeni kitaphanalardyń basty maqsaty – sapaly adamı kapıtaldy arttyrýǵa yqpal etý, joǵary bilimdi, jan-jaqty urpaq qalyptastyrýǵa úles qosý. Osy oraıda, Ulttyq kitaphananyń basty mindetteriniń biri – turǵyndardyń kitap oqýǵa qushtarlyǵyn arttyrý arqyly jas urpaqty oqýǵa tartý jáne tóltýma mádenıetimizdi saqtap qalý. Adamı kapıtal sapasyn nyǵaıtý jáne ulttyń rýhanı, ıntellektýaldy serpilisiniń qajetti quraly retinde halyqty oqýǵa tartýǵa, olardyń zamanaýı bilim alýyna barlyq múmkindikterdi jasaýǵa tıispiz, – dedi Ulttyq kitaphana dırektory Janat Seıdýmanov.
Sonymen qatar Ulttyq kitaphananyń jastarynan quralǵan Jastar keńesi keń aýqymdy talqylaý jasap, Joldaýdyń mańyzy men erekshelikteri turǵysyndaǵy jeke oı-pikirlerin ortaǵa saldy.
«Biz Elbasynyń Joldaýymen tanystyq. Endi kórsetilgen 10 baǵyt boıynsha jumys istep, kúsh salamyz. Onyń ishinde jańa tehnologııalardy damytýǵa úles qosý úshin kitaphana isinde onlaın qyzmet kórsetý men elektrondy basylymdarǵa basymdyq berýdi jalǵastyratyn bolamyz», deıdi Jastar keńesiniń jetekshisi Aıkenje Jaqsylyqqyzy.
Elbasynyń Qazaqstan halqyna kezekti Joldaýy mańyzdy tarıhı qujat degen kitaphana mamandary, ony júzege asyrýǵa árbir kitaphanashy óz eńbegimen, óz qyzmetimen úles qosatynyn bildirdi.
Arman OKTIаBR, «Egemen Qazaqstan»
ALMATY