Elbasy Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynan týyndaıtyn mindetterdi júzege asyrý maqsatynda Jambyl oblysynda aqparattyq top qurylyp, óz jumysyn bastady. Aqparattyq toptyń jumysy Taraz qalasynan bastaý alyp, turǵyndarǵa Elbasy Joldaýyn jáne memlekettik baǵdarlamalardyń iske asyrylý barysyn túsindirýde.
Taraz qalalyq Mádenıet úıinde Jambyl oblysy ákiminiń birinshi orynbasary, Taraz qalasy boıynsha aqparattyq toptyń jetekshisi Bekbolat Orynbekovtiń tóraǵalyǵymen qala aktıviniń jıyny ótti. Atalǵan jıynda qala ákimi Rústem Dáýlet baıandama jasap, Elbasy Joldaýynda aıtylǵan ónerkásiptik revolıýsııa álemine beıimdelýdiń 10 mindetine toqtaldy. Jalpy, Taraz qalasynda 2015-2017 jyldar aralyǵynda jalpy quny 19,3 mıllıard teńgeni quraıtyn 9 ındýstrııalyq joba iske qosylǵan eken. Nátıjesinde 290 jańa jumys orny ashylǵan. Endi Elbasy Joldaýynan týyndaıtyn mindetterdi júzege asyrý aıasynda ústimizdegi jyly jalpy quny 6 mıllıard 924 mıllıon teńge bolatyn 4 ınvestısııalyq jobany iske asyrý josparlanyp otyr. Nátıjesinde 607 jańa jumys orny ashylady. Sonymen qatar shahar basshysy qaladaǵy kásiporyndarda sıfrly tehnologııalardy engizý jumystary qolǵa alynǵanyn da atap ótti.
О́ńirde qurylǵan aqparattyq toptyń jumys kestesine sáıkes, oblystyq kásipkerlik jáne ındýstrııalyq-ınnovasııalyq damytý basqarmasynyń basshysy Qarlyǵash Aralbekova men oblys ákimi apparatynyń agroónerkásip kesheni monıtorıngin damytý bóliminiń basshysy Dýlat Ospanov Shý aýdanynda bolyp, aýdan aktıvimen kezdesti. Aktıv jıynynda sóz alǵan aýdan ákimi Qaırat Dosaev Elbasy Joldaýy turǵyndardyń ál-aýqatyn arttyrýǵa jáne qoǵamnyń damýyn qamtamasyz etýge baǵyttalǵanyn atap ótti. О́z sózinde Qarlyǵash Aralbekova oblysta kásipkerlikti qoldaý kartasy boıynsha jalpy quny 568 mıllıard teńgeni quraıtyn 36 ınvestısııalyq joba júzege asyrylyp jatqanyn, al elimizdiń ındýstrııalyq-ınnovasııalyq damý baǵdarlamasynyń alǵashqy besjyldyǵynda Shý aýdanynda jalpy quny 1,5 mıllıard teńge bolatyn 2 joba jáne 5,7 mıllıon AQSh dollaryn quraıtyn 1 joba iske asyrylǵanyn aıtty.
Oblystyq máslıhattyń hatshysy Baǵlan Qarasholaqov bastaǵan aqparattyq top Moıynqum aýdanynda bolyp, tórt baǵyt boıynsha túsindirý jumystaryn júrgizdi. Aktıv jıynyn aýdan ákimi Baqytjan Núrkenov ashyp, júrgizip otyrdy. Sonymen qatar oblystyq máslıhat apparatynyń basshysy Birjan Kúzembekov, oblystyq ekologııa departamentiniń basshysy Qanatbek Mádibek, oblystyq qazaq drama teatrynyń dırektory Bolat Bekjanov, Taraz ınnovasııalyq-gýmanıtarlyq ýnıversıtetiniń prorektory Sanat Áshirbekov, oblystyq din isteri basqarmasynyń basshysy Jangeldi Omarov jáne basqa da azamattar aýdannyń Qylyshbaı, Qumózek, Qarabóget aýyldarynda bolyp, kópshilikpen kezdesti.
Al «Nur Otan» partııasy oblystyq fılıaly tóraǵasynyń birinshi orynbasary Murathan Shúkeev Talas aýdanyna kelip, «Qazfosfat» JShS-na qarasty «Sholaqtaý» taý-ken kesheninde ótken kenshiler jıynyna qatysty. Munda Elbasy Joldaýynan týyndaǵan mindetter áńgime ózegine aınalyp, óndiristi órkendetý jaıy sóz boldy. Keshen jumysshylary kezdesý barysynda Elbasy Joldaýy, ásirese hımııa salasynyń qyzmetkerlerine serpin beretinine, sondyqtan óńirde óndiris salasy órkendeı beretinine senim bildirdi.
Hamıt ESAMAN, «Egemen Qazaqstan»
Jambyl oblysy