Úıde bir jibek kilem bar edi. Ol ózi sirá, óte qymbat dúnıe bolsa kerek. Sebebi ótken ǵasyrdyń basynda Úsipbaı bolys Samarqannyń bazarynan aldyrypty desetin.
Al endi, onyń osy shańyraqqa qalaı tap bolǵanyn bir-aq aýyz sózben qaıyrsaq, meniń ájem – Úsipbaı bolystyń nemeresi ekenin esterińizge sala ketýge týra keledi. Demek, baıaǵyda-a-a... tipti, atam zamanda desek te jarasady, bolysekeń nemeresin uzatqanda, qyz jasaýyna qosyla jónelgen parsy kilemi ǵoı. Biz kórgeli, únemi oraýly turatyn.
Keıin ákem aýyldyń shetinen jańa úı salyp, qonys toıyn jasaýǵa ázirlenip jatqanymyzda sheshem álgi kilemdi tórgi bólmege ildirmek boldy. Sol kezde qolyna qumanyn ustap, syrtqy esikten ishke qaraı kirip kele jatqan ájemniń:
– Áı, – degen daýsy bárimizdi selk etkizgeni. – Tutpańdar o kilemdi! Jerge tóseńder!..
Úı ishindegiler ún-túnsiz melshıdik te qaldyq. Apyr-aı, úlken kisiniń munysy nesi? Mynandaı qymbat dúnıeni aıaq asty etip, jerge qalaı tósemekpiz? Onyń ústine bul bizdiń úıdegi kózge kórinetin jalǵyz múlik emes pe?!
Biraq ájem aıtty, bitti. Zań. Otbasynyń bıligi ázirge sol kisiniń qolynda. Sondyqtan kóz qımaıtyn qymbat kilemdi jarqyratyp jerge tósedik te tastadyq.
Esesine ájem jaryqtyq keshki shaıdyń ústinde ómir baqı esimizden ketpeıtindeı bir áńgime aıtyp, bárimizdiń kóńilimizdi bosatty.
– E-eı, shyraqtarym-aı, – dedi qolyndaǵy kesesin shaıqap-shaıqap qoıyp, tereń oıǵa batyp. – Bul kilemdi kezinde keregege tutyp, arqasyn súıep otyryp áńgime-dúken qurǵan er-azamattar qaıda qazir? Sender sony bilesińder me?..
Ájemniń kózinen qos tamshy jas yrshyp tústi.
– Qarańqalǵyr qý dúnıeni qabyrǵaǵa ilip, áspetteýdiń keregi joq endi!.. Jerge tóseńder degenim, eń bolmasa, aıaqtaryń jyly júrsin!
Nurǵalı ORAZ, «Egemen Qazaqstan»