Bul oqıǵa 1997 jyldyń jazynda kóz aldymda ótip edi, áli kúnge oıymnan keter emes. Jaı qatardaǵy qyzmetkerdiń kúndelikti jumysyn atqarýdaǵy tabandylyǵyn, jaýapkershiligin jáne ustamdylyǵyn erlik dep sanaýǵa laıyq dep paıymdap, azamattyq paryzym retinde dúıim jurtqa jarııalaǵym keledi.
Meniń anam Dildaqyz Ismaılova jasy ulǵaıǵanda júregi syr bere bastady. Onyń ústine polıartrıt degen kesel jabysyp, saýsaqtaryn qımyldata almaı qalyp edi. Ol kezde men Almatydamyn. Sheshemdi emdetý úshin aýyldan alyp kelip, qaladaǵy Kardıologııa ınstıtýty janyndaǵy emxanaǵa jaıǵastyrdyq. Emdeý mekemesiniń ujymy batyr ana keldi dep ony jaqsy qabyldady.
Emdeýshi dáriger retinde zeınetkerlik jasqa kelse de, qyzmetin jalǵastyryp kele jatqan Anna Andreevna Beloýsova degen kisi taǵaıyndaldy. Sheshemizdiń jaǵdaıy úshin ol kisige jalpaqtap, ártúrli jaqsylyq jasaǵymyz keledi, biraq ol ózin óte mádenıetti, boryshyna adal adam retinde kórsetti. Kerisinshe, ol kezde tabyla bermeıtin dárilerdi izdeýge ózi kómektesip, basqa da aqyl-keńesterin aıtyp otyratyn. Shynyn aıtý kerek, syrt qaraǵanda eshqandaı jaqyndyǵy joq, basqa ult ókiliniń mundaı bıik adamgershilik qasıeti bizdi tańǵaldyrdy. Onyń ústine dáriger anamyzǵa erekshe kózqaraspen qarap, keıbir asa jaýapty emsharalardy medbıkelerge júktemeı, ózi jasaıtyn. О́ıtkeni eki derttiń emdik sharalaryn bir-birine úılestirý qıyndyq týǵyzdy.
Jumystan kesh qaıtatyndyqtan aýrýxanaǵa túski úzilisti paıdalanyp, kúndelikti baryp turatynmyn. Sondaı bir kezekti kelgenimde Anna Andreevna palatada shesheme arnaıy elektr apparatymen emshara jasap otyr eken. Úlken palatada bes-alty adam jatady. Men olarmen amandasyp, janynda áńgimemdi aıtyp otyrǵanmyn. Bir kezde aýrýxananyń bir qyzmetkeri esikten júgirip kelip: – Anna Andreevna, sizdiń úıińiz órtenip jatyr, – dep xabarlady. Ol kisi estidim degendeı basyn bir shulǵyp, jumysyn jalǵastyra berdi. Habardy estip otyryp meniń mazam ketti. Sálden keıin jańaǵy kisi taǵy kelip: – mama, seniń úıiń órtenip jatyr (sóıtsem óziniń týǵan qyzy da sonda dáriger eken), nege jaıbaraqat otyrsyń? – dep, shegelep aıtty. Dárigerimiz sabyrly qalyppen: – Iá, estidim. Kórip otyrsyń ǵoı, myna emsharany toqtatýǵa bolmaıdy, – dep jaýap berdi.
Ol kisiniń ustamdylyǵyna tańǵalyp, onyń ornynda men bolsam qaıter edim degen oımen, istiń aqyryn kúteıin dep sheshtim. On saýsaqqa jeke-jeke jasalatyn emshara bitkesin, apparatyn jınastyryp, Anna Andreevna maǵan: – Al Baıanbaı, endi óziń anańmen ońasha sóılese ber, men taksımen baryp úıimdi kóreıin, ne boldy eken? – dep, shyǵyp bara jatyr. – Toqtańyz, men sizdi ádeıi kútip otyrmyn, ózim aparamyn kólikpen, – dep artynan erdim.
Ol kisi qazirgi Qonaev kóshesinde, eski kirpish úıdiń birinshi qabatyndaǵy páterde turady eken. Úıde jalǵyz otyrǵan kúıeýi gaz plıtada qaınap turǵan shaıdy umytyp, óz sharýalarymen kóshege shyǵyp ketipti, sol kezde terezeniń perdesine ot tıip, jalyny ashyq turǵan fortochkadan syrtqa laýlapty. Muny kórgen kórshi jigitter biz kelgenshe uzyn taıaqpen gaz plıtanyń qulaǵyn jaýyp, otty sóndirip úlgergen eken.
Bul oqıǵaǵa qazir jıyrma jyl bolypty. Qansha ýaqyt ótkenmen joǵary sanatty dáriger, qarapaıym azamat Anna Andreevna Beloýsovanyń úıi órtenip jatyr degen xabardy estı otyryp, salqynqandylyqpen óz mindetin abyroımen atqaryp shyǵýyn úlken kásibı erlik dep baǵalap, búgingi jastarǵa úlgi etkim keledi.
Baıanbaı ISRAILOV
Astana