Prezıdent janyndaǵy Adam quqyqtary jónindegi komıssııanyń keńeıtilgen otyrysy ótti

Onda esirtkiniń zańsyz aınalymy men esirtkige táýeldilikke qarsy kúres, nashaqorlyqtyń aldyn alýǵa jáne azamattardyń densaýlyǵyn saqtaý quqyǵyn qamtamasyz etý, salamatty ómir saltyn qalyptastyrý máse­le­leri keńinen qaraldy. Sondaı-aq halyq­tyń densaý­lyǵyn saq­taý jáne nasha­qor­lyqtyń aldyn alý, sa­lamat­ty ómir saltyn qa­lyp­tas­ty­rýmen qatar, esirtki bız­nesi men na­shaqorlyqqa qarsy is-qı­myl­dyń jaı-jap­sary talqylandy.

Osy ózekti má­selelerge baılanysty Ishki ister mınıstri Qalmuhanbet Qasymov pen Den­saýlyq saqtaý vıse-mınıstri Lıazzat Aqtaeva baıandama jasady. Sońǵy kezderi arzan esirtki túrlerin satý amaldary tirkelip otyr. Ony daıyndaý da, satý da jeńil kórinedi. Biraq ony paı­dalanǵan adam birden aýyr psıhıkalyq dertke ushyraıdy eken. Al «Esirtki zattary týraly» zańǵa baılanysty zańda tirkelgen esirtkiler ǵana esirtki zattary bolyp tanylady. Sondyqtan joǵa­ryda aıtylǵan sıntetıkalyq esirt­kiler tizimde joq. 

Baıandamada aıtylǵan másele­lerdi talqylaýǵa qatysqan sarapshylar nashaqorlyqtyń aldyn alý men emdeý isi eldiń densaýlyq saq­taý salasyn damytýdaǵy negizgi basymdyqtardyń biri bolyp qa­la berýge tıis ekenin atap ótti. Osy­ǵan oraı komıssııa músheleri nashaqorlyq pen esirtki bıznesiniń aldyn alý men oǵan qarsy sharalardy úılestirý máseleleri jónindegi komıssııanyń, oblys­tar, Astana jáne Almaty qa­la­­lary ákimdikteri janyndaǵy nashaqorlyqpen jáne esirtki bızne­simen kúres jónindegi óńir­lik komıssııalardyń na­sha­qor­lyq­tyń aldyn alý, esirt­kige táýel­di adamdardy medı­sı­na­lyq jáne áleýmettik ońaltý qyz­metin jan­dandyrý qajettigin tilge tıek etti.

Shyǵyp sóıleýshiler atalǵan máselelerge qatysty aldyn alý jumysy aıasynda barlyq deńgeı­degi ákimderdiń, bilim berý, densaý­lyq saqtaý, mádenıet jáne sport uıymdarynyń nazaryn balalar­dyń, jasóspirimder men jastar­dyń bos ýaqytyn durys uıym­dastyrýǵa aıryqsha bólý kerek­tigin aıtty. Sondaı-aq sport túr­lerimen tegin shuǵyldaný klýb­­tary jelisin, týrızmmen, dene shynyqtyrýmen jáne sportpen aı­nalysýǵa arnalǵan seksııa­lardy damyta berý qajettigi eskerildi. Oǵan qosa on eki jasqa tolmaǵan, az qamtylǵan jáne tur­my­sy nashar otbasylardan shyq­qan balalarǵa arnalǵan jazǵy de­m­alys lagerlerin damytý usy­nyldy. 

Komıssııa otyry­syna zań shyǵarýshy, atqarýshy jáne sot tarmaqtarynyń ókilderi, ha­lyqaralyq jáne úkimettik emes uıymdardyń, emdeý mekemelerdiń, advokatýranyń jáne t.b. salalar ókilderi qatysty. Olar joǵaryda aıtylǵan negizgi eki máselemen qatar, Qazaqstan Respýblıkasy Konstıtýsııasynyń 26-babynda kózdelgen menshiktiń kons­tıtýsııalyq kepildikterin qamta­masyz etýdiń ózekti má­selelerin de talqyǵa saldy. Al komıssııanyń otyrysynda tujyrymdalǵan usynymdar Memleket basshy­synyń, Parlament pen Úkimettiń nazaryna joldanbaq.

Aleksandr TASBOLAT, «Egemen Qazaqstan»