Astanadaǵy Nazarbaev ortalyǵynda «Qazaqstan joly. Táýelsizdik dáýiri» atty Qazaqstan Respýblıkasynyń Prezıdenti N.Á. Nazarbaevtyń «Táýelsizdik dáýiri» kitabyn talqylaýǵa arnalǵan halyqaralyq ǵylymı konferensııa ótti.
Konferensııa barysynda qazirgi zamanǵy tarıh ǵylymynyń ózekti máseleleri, ulttyq tarıhı mektepterdiń erekshelikteri jáne postkeńestik memleketterdegi tarıhı bilim berý máseleleri talqylandy.
Konferensııaǵa Reseı, Belarýs, Ýkraına, О́zbekstan, Qyrǵyzstan elderiniń tanymal sarapshylary, otandyq memleket jáne qoǵam qaıratkerleri, dıplomatııalyq korpýstyń ókilderi, ǵylymı-zertteý ınstıtýttarynyń ǵalymdary men respýblıkalyq joǵary oqý oryndarynyń ǵylymı qyzmetkerleri qatysty.
Is-sharany Qazaqstan Respýblıkasy Tuńǵysh Prezıdenti – Elbasynyń Qory jáne QR BǴM ǴK Memleket tarıhy ınstıtýty ótkizdi.
Konferensııa barysynda QR Tuńǵysh Prezıdenti – Elbasy qorynyń Atqarýshy dırektory Qanat Jumabaev bylaı dep atap ótti: «Táýelsizdik jyldarynda Elbasynyń bastamasymen orasan jumys júrgizildi. Damyǵan memlekettik jáne qoǵamdyq ınstıtýttary bar turaqty saıası qurylym quryldy, naryqtaǵy irgeli zańdarǵa negizdelgen ıkemdi, tıimdi ekonomıkalyq model qalyptastyryldy. Elimiz álemdik qoǵamdastyqtyń tolyq jáne qurmetti múshesi boldy. Elimiz halyqaralyq deńgeıde keń tanyldy. Biraq táýelsiz Qazaqstannyń basty jetistigi - turaqty jáne tutas qoǵam. Búgin biz Úshinshi jańǵyrý jáne «Rýhanı Jańǵyrý» baǵdarlamasy sheńberinde júıeli reformalar júrgize otyryp, jańa damý kezeńine kóshtik. Degenmen bolashaq baǵyt-baǵdardy aıqyn qalyptastyrý úshin memleketimiz ótken joldy zertteý óte mańyzdy. Bul turǵyda «Táýelsizdik dáýiri» kitabyn jan-jaqty taldaý bizdiń jetistikterimizdi, atqarylǵan jumysty baǵalaýǵa múmkindik beredi. Bul Prezıdentimiz Nursultan Nazarbaevtyń ıdeıalary men bastamalarynyń tarıhı turǵydan durys ári qajet ekenin taǵy bir ret dáleldeıdi».