Astanada ótken Parlament palatalarynyń birlesken otyrysynda Elbasy Nursultan Nazarbaev Qazaqstandaǵy gazdandyrý máselesine toqtalyp, 2 mln 700 myń adamdy gazben qamtýǵa múmkindik beretin Qaraózek magıstraldi gaz qubyryn salýdy tapsyrdy.
«Qazaqstanda jylyna 2 mlrd kýb metr gaz óndiriledi. Bul kórsetkish jyldan jylǵa artyp otyratynyn bilemin. Búgingi tańda Qazaqstandaǵy gazdandyrý deńgeıi shamamen 50 paıyzdy qurap otyr. Sonymen qatar 9 oblysqa gaz jetkizilgen. Biraq, soǵan qaramastan, elimizdiń ortalyq, soltústik oblystary áli de gazsyz otyr. Osy máseleni sheshý úshin men Qyzylorda oblysyndaǵy Qaraózek degen jerden Jezqazǵan, Qaraǵandy, Temirtaý, Astana arqyly magıstraldi gaz qubyryn salýdy tapsyramyn. Bul 2 mln 700 myń adamdy gazben qamtýǵa múmkindik berýmen qatar, Arqanyń ekologııalyq jaǵdaıyn jaqsartýǵa yqpal etetin bolady», dedi Prezıdent.
О́z sózinde Elbasy batystaǵy gaz tuńǵysh ret Almatyǵa deıin jetkizilgenin atap ótti. Sonymen qatar bul joba arqyly kúzde Astananyń tumandanyp ketý máselesin de sheshýge bolatynyn aıtty.
«Ekologııalyq máseleni sheshýge múmkindik bar. Tipti, Astananyń ózinde zııandy qaldyqtardyń aýaǵa taralýyn 35 myń tonnaǵa azaıtýǵa bolady. Arqanyń sary jeli barlyǵyn alyp ketedi dep oılaǵanymyzben, keıingi kezde halyqtyń kóbeıýine baılanysty qalanyń ústinde únemi tuman turatyn boldy. Qala ákimshiligi bul problemany sheshý úshin jumys istep jatyr. Gaz qubyryna baılanysty jumysty 1-1,5 jyldyń ishinde sheshý kerek», dedi Elbasy.
Esterińizge sala ketsek, Astanada Parlament palatalarynyń birlesken otyrysy ótip jatyr. Onda Prezıdent tómen jalaqy alatyndar úshin salyqty 10 esege azaıtýdy tapsyrdy. Sonymen qatar 2019 jyly qosymsha 20 myń memlekettik bilim granty bólinetinin aıtyp, «7-20-25» ıpotekalyq baǵdarlamasyn usyndy. Sondaı-aq Prezıdent shaǵyn nesıeni 20 mlrd teńgege kóbeıtýdi tapsyrdy.
Aıta ketý kerek, 2 naýryzda Parlament Májilisiniń Tóraǵasy Nurlan Nyǵmatýlın Parlament palatalarynyń birlesken otyrysyn shaqyrý týraly О́kimge qol qoıǵan bolatyn. Birlesken otyrysqa Joǵarǵy Sot, Úkimet músheleri tolyq quramda, Prezıdentke tikeleı esep beretin jáne baǵynatyn organ basshylary, ulttyq kompanııalar men memlekettik uıymdar basshylary qatysyp otyr.
Gúlnur Qýanyshbekqyzy,
«Egemen Qazaqstan»