Erekshe avtosherýdi oblystaǵy Jastar resýrsy ortalyǵy oblystyq ishki ister departamentimen birlesp ótkizdi. Oǵan bıyl batyldyq kórsetken 23 áıel ynta bildirdi.
Aksııaǵa qatysý úshin áıelder mashıtnasyn kórkemdep, bezendirýi tıis bolatyn. Mashınasyn áıelder túrli obrazda bezendirdi. Osy jarysta bas júldeni alǵan Ekaterına Kojevına óziniń temir tulparyna kóılek pen shlıapa «kıgizdi».
«Eń bastysy maqsatymyz, áıelderdiń yntymaqtasyp, birigýi, aralasýyna múmkindik jasaý, jol erejesin saqtaýdy nasıhattaý jáne kópshilikke merekelik kóńil kúı syılaý boldy» deıdi Jastar resýrsy ortalyǵynyń dırektory Aıgúl Abdýllına.
Áıelder júrgizgen temir tulparlar sherýi qala ortasyndaǵy Jeńis saıabaǵynan ortalyq Abaı dańǵyly arqyly qalanyń bir shetindegi «Astyqjan» saýda ortalyǵyna deıin júrip ótti. Sherýdi kórgen qalalyqtardy mashınalardyń bezendirilýi erekshe qyzyqtyrdy. Mysaly sherýge qatysqan Memlekettik qyzmet jáne sybaılas jemqorlyqqa qarsy is-qımyl departamentiniń qyzmetkeri Ǵalııa Qasymova óziniń «Lada Prıorasyn» «Rýhanı Jańǵyrý» baǵdarlamasyna oraı ulttyq oıýlarmen jáne ulttyq kıim kıgen qýyrshaqpen bezendiripti. Ǵalııanyń rýlge otyrǵanyna 10 jyl boldy. Osy jyldar ishinde ol eshqashan jol erejesin buzyp nemese jol-kólik oqıǵasyna ushyrap kórmepti. Oǵan bul iste óziniń joldasy kómektesedi.
Sherýge Qostanaı qalasyndaǵy jolaýshylar tasymaly kásipornynan bes áıel-taksıshiler qatysty. Avtosherýge qatysýshylardyń barlyǵy da jolda jyldamdyqty saǵatyna 40 shaqyrymnan asyrmaýdy, birin biri basyp ozbaýdy, kerýenshe tizilip júrip otyrýdy naqty oryndady.
«Rýlge arýlar otyrǵan avtosherýdiń taǵy bir maqsaty, áıel mashına aıdaı almaıdy degen qalyptasyp qalǵan túsinikti joqqa shyǵarý edi. Qaıta eń uqypty jáne jol erejesin qatań saqtaıtyn áıel júrgizýshiler ekenin aıtqym keledi» deıdi jergilikti polısııa bastyǵynyń orynbasary Álibek Bermuqanov. Sherý márege jetken soń, uıymdastyrýshylar júrgizýshiler úshin vıktorınalyq suraqtar qoıdy. Júrgizýshi arýlardyń barlyǵy da mereke aldyndaǵy syılyqtarǵa ıe boldy.
Názıra JÁRIMBET,
«Egemen Qazaqstan»
Qostanaı