Parlament Senatynda Darıǵa Nazarbaevanyń tóraǵalyq etýimen Halyqaralyq qatynastar, qorǵanys jáne qaýipsizdik komıteti men Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń músheleri sý qaýipsizdigi máseleleri boıynsha memlekettik múddeli organdar basshylarymen kezdesti.
Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva kezdesýdi asha kelip, shekteýli ári shaǵyn sý resýrstary jaǵdaıynda sý qaýipsizdigi máseleleri bizdiń elimizde ulttyq qaýipsizdiktiń bir bóligi retinde qarastyrylatynyn aıtty. Jahandyq jáne aımaqtyq tabıǵat ózgeristeri, sý qatynastaryndaǵy memleketaralyq kelispeýshilikter, sý shyǵyny kóp tehnologııany jáne sýdy retteý men bólýde artta qalǵan tehnıkalyq jabdyqtardy paıdalaný elimizdi sýmen qamtamasyz etýdegi basty qaýip bolyp tabylady.
Senator kóktemgi sý tasýy jyl saıynǵy ózekti másele bolyp otyrǵanyn atap ótti. Memlekettik organdar jumysyndaǵy júıeli qatelikterdiń saldary daǵdyly tasıtyn sýdan kútpegen apattarǵa dýshar etip otyr.
Sóz alǵan Ishki ister mınıstriniń orynbasary Iýrıı Ilın IIM ortalyq jáne jergilikti atqarýshy múddeli organdarmen birlese otyryp, «2017-2020 jyldarǵa arnalǵan tasqyn sý qaýpin boldyrmaý jáne joıý jónindegi sharalar kesheni» jol kartasyn iske asyrýdy jalǵastyryp jatqany týraly habardar etti.
Iý.Ilın kóktemgi jaıylma sýǵa daıyndyqta tótenshe jaǵdaılar jónindegi ortalyq jáne aımaqtyq komıssııalar qabyldaǵan sharalarǵa qaramastan birqatar ózekti máseleler saqtalyp otyrǵanyn, olardyń ishinde eń aldymen, sýdan qorǵaý keshenderiniń jaǵdaıy, eldi mekenderdi qorǵaý jumystaryn uıymdastyrý, bógetter qurylysy men ózen arnalaryn tazalaý, kópirlerdi jańǵyrtý bar ekenin atap ótti.
Aýyl sharýashylyǵy mınıstriniń orynbasary Rústem Qurmanov respýblıkalyq menshiktegi sýdan qorǵaý keshenderin bıylǵy sý tasqynyn ótkizýge daıyndaý jáne tasqyn sýdyń yqtımal zardaptarynan bolatyn zııandardyń aldyn alý jónindegi eskertý sharalary boıynsha aýyl sharýashylyǵy mınıstrligi qabyldaǵan sharalar týraly baıandady.
Kezdesýdi aıaqtaı kelip komıtet tóraǵasy D. Nazarbaeva talqylaýdyń qorytyndysy boıynsha ázirlengen usynymdar úkimetke jiberiletinin jáne zań shyǵarý jumystary barysynda eskeriletinin aıtty.