Elbasynyń usynystary halqymyzdyń áleýmettik jaǵdaıyn jaqsartýǵa aıryqsha zor áserin tıgizedi dep esepteımin.
Búkil álem boıynsha memlekettik áleýmettik baǵdarlamalar keıinge shegerilip, úkimetter burynǵy mindetterinen bas tartyp jatqan aýmaly-tókpeli shaqta Memleket basshysy osyndaı batyl bastamalardy qolǵa alyp otyr.
Osylaısha Elbasymyz kezekti ret Qazaqstan úshin halqynyń áleýmettik jaǵdaıy árdaıym basym baǵyt bolyp sanalatynyn is júzinde dáleldep berdi. Tipti ekonomıkalyq jaǵdaıdyń eńse túsirgen kezinde de halyqtyń múddesi jalpyulttyq kún tártibindegi basty másele bolyp qala berdi.
Osy rette jańa baǵdarlamany shyn máninde biregeı etip, mańyzyn arttyra túsetin birneshe bólimderdi atap ótkim keledi.
Eń aldymen, bul bastamalardyń der kezinde qolǵa alynyp otyrǵanyna erekshe nazar aýdarǵan jón. Máselen, áli kúnge deıin júz myńdaǵan qazaqstandyq otbasylar úshin baspana máselesi ózekti kúıinde qalyp otyr. Endi jańa «7 – 20 – 25» baǵdarlamasy arqyly kóptegen otandastarymyz úshin aıtarlyqtaı tıimdi ıpotekalyq zaım alýǵa naqty múmkindik týmaq. Bul baǵdarlamany sátti júzege asyra bilsek, áleýmettik ahýal ǵana jaqsaryp qoımaı, turǵyn-úı qurylysynyń damýyna, ekonomıkanyń ósýine, jumys oryndarynyń ashylýyna jáne jeke kásippen aınalysýdyń jańa múmkindikterine de tyń serpin beriledi.
Salyq júktemesin tómendetý bastamasy da halyqqa áleýmettik qoldaý kórsetýdiń tıimdi tetigi. Memlekettiń salyqty kótermeı, kerisinshe salystyrmaly túrde jalaqysy tómen azamattardyń jaǵdaıyna túsinistikpen qaraýy da úlgi bolarlyq jaıttardyń biri.
Elbasynyń joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý bastamasy – strategııalyq qadam. Tórtinshi ónerkásiptik revolıýsııa jaǵdaıynda elimizge joǵary bilikti ınjenerler men aqparattyq tehnologııa jáne robot tehnıkasy salasynyń mamandary qajet. Bul – adam resýrstaryna qosylǵan úles jáne jarqyn bolashaqqa salynǵan ınvestısııa.
Shaǵyn nesıe berýdi kóbeıtý de kásipkerlikti qoldaý maqsatynda ýaqtyly qolǵa alynǵan shara. Osy bastamanyń arqasynda tek qalalyq qana emes, sondaı-aq, aýyldyq jerlerdegi myńdaǵan qazaqstandyqtar óz kásibin bastaýǵa múmkindik alady. Sonyń nátıjesinde elimizdiń ishki jalpy ónimindegi shaǵyn jáne orta bıznestiń úlesin 50 paıyzdan kem qylmaýǵa baǵyttalǵan strategııalyq maqsatymyzǵa taǵy bir taban jaqyndaı túsemiz.
«Kógildir otyn» máselesine keler bolsaq, eldi gazben qamtamasyz etý jónindegi aýqymdy joba qýatty ekonomıka jaǵynan aıryqsha mánge ıe. Odan bólek, qorshaǵan ortany qorǵaý isine de bul bastamanyń taǵy bir mańyzdy qyry retinde qaraýǵa bolady. Elbasy atap ótkendeı, eger Astanaǵa «kógildir otyn» jetkizilse, tek elordamyzdyń ózinde zııandy qaldyqtardyń aýaǵa taralýy 6 esege deıin tómendeıdi. Bul, árıne, óz kezeginde halqymyzdyń densaýlyǵyna ıgi áserin tıgizedi.
Prezıdenttiń barlyq bastamasy jan-jaqty saraptalyp, zerdelengenin jáne olardy júzege asyrýǵa naqty qarjylaı negiz bar ekenin atap ótken jón. Sonyń arqasynda qazaqstandyqtar Elbasy tapsyrmalaryn júzege asyrýdyń nátıjelerin taıaý jyldarda sezine alady.
Memleket basshysy bul mańyzdy bastamalardyń júzege asyrylýyn baqylaýdy «Nur Otan» partııasyna júktedi. Osyǵan oraı Elbasy tapsyrmasy partııa jumysynyń aldaǵy ýaqyttaǵy negizgi mindeti bolatynyn erekshe atap ótkim keledi. Bul bastamalar áleýmettik memleket jáne ulttyq ál-aýqattyń qazaqstandyq úlgisin qalyptastyrý aıasyndaǵy mańyzdy qadam bolyp tabylady. Sondyqtan Prezıdenttiń strategııalyq bastamalarynyń oryndalýyna sapaly baqylaýdy qamtamasyz etý úshin barlyq kúshimizdi jumyldyramyz.
Máýlen ÁShIMBAEV,
«Nur Otan» partııasy Tóraǵasynyń birinshi orynbasary