Ońtústik Qazaqstan oblysynda bıyl 9 aýdannyń 20 eldi mekeninde 212 páterli 20 qyzmettik turǵyn úı qurylysy bastalady.
Jalpy aǵymdaǵy jyly barlyq qarjylandyrý kózderi esebinen 730 myń sharshy metr turǵyn úıdi paıdalanýǵa berý josparlanyp otyr. Budan bólek, 13,8 mlrd teńgeni quraıtyn 22,9 myń sharshy metr nemese 1644 páterli 28 turǵyn úıdiń jobalaý-smetalyq qujattamasy ázirlenip, respýblıkalyq bıýdjetten qosymsha qarjy bólýge tıisti usynys berilgen. Bul jumystar Elbasynyń «Prezıdenttiń bes áleýmettik bastamasy» atty halyqqa úndeýinde aıtylǵan «árbir otbasyna baspana alýdyń jańa múmkindikterin berýdi» júzege asyrýǵa septigin tıgizbek.
Oblys ákimi J.Túımebaevtyń tóraǵalyǵymen ótken, Memleket basshysy kótergen áleýmettik bastamalardyń óńirde oryndalýy júıesi talqylanǵan jıynda óńirde turǵyn úı qurylysyn belsendi túrde iske asyrý basty nazarda turǵany aıtyldy. Máselen, 77 nysannyń qurylysyna 27,4 mlrd teńge qarastyrylǵan. Sondaı-aq, oblys ákimi Elbasy bastamalaryn tolyǵymen júzege asyryp, oblystyń áleýmettik-ekonomıkalyq jaǵdaıyn kóterý men turǵyndardyń ál-aýqatyn jaqsartý ekendigin atap ótti. О́zge de áleýmettik bastamalardyń óńirde oryndalýyn júıeledi. Mysaly, úshinshi bastama aıasynda respýblıka boıynsha 2022 jyldyń sońyna deıin stýdentterge arnap keminde 75 myń oryndyq jańa jataqhana salynady. Bul sharamen oblystyń stýdentteri de qamtylatyn bolady. Al «Shaǵyn nesıe berýdi kóbeıtý» baǵytynda bıylǵy jyly «Ońtústik» aımaqtyq ınvestısııalyq ortalyǵy arqyly 4 mlrd. teńgege shaǵyn jáne orta bızneske kómek kórsetilý josparlanýda. Jastardy qoldaý maqsatynda «Jas kásipker» baǵdarlamasy júzege asyrylýda. Baǵdarlama aıasynda kásipkerlikpen aınalysýǵa nıet bildirgen jastarǵa kepilsiz 2 mln teńge kóleminde nesıe qarajaty usynylady.
Jıynǵa qatysqan memleket jáne qoǵam qaıratkerleri, el belsendileri Elbasy bastamalaryn qoldap, Úndeýde atap kórsetilgen máseleler júıeli túrde oryndalý qajettigin alǵa tartty.
Ǵalymjan ELShIBAI,
«Egemen Qazaqstan»