«Prezıdenttiń bes áleýmettik bastamalaryn» iske asyrý aıasynda shaǵyn nesıelendirýdi keńeıtý tetikteri týraly búgin QR Úkimetiniń baspasóz ortalyǵynda eńbek jáne halyqty áleýmettik qorǵaý vıse-mınıstri Nurjan Áltaev aıtyp berdi.
Brıfıng barysynda tilshiler kásipkerlikpen aınalysqysy keletinderge jańa shaǵyn nesıelendirý baǵdarlamasy boıynsha granttar bóline me sony surady. Vıse-mınıstr aıtyp ótkendeı, 2017 jyly Qazaqstanda pılottyq rejımde birqatar óńirlerde óziniń shaǵyn kásibin ashqysy kelgenderge granttar bólý tetikteri synaqtan ótkizildi. Memleket bul maqsattarǵa 30 mln jýyq teńge bóldi.
250 myń teńge grant somasyna, mysalǵa úı sharýasyndaǵy áıel tigin mashınasyn satyp alyp, úıinde qandaı da bir buıymdardy tigýdi bastaı alady. Nemese elektrmen dánekerleýshi qysqa merzimdi kýrstarda oqyǵannan keıin osyndaı grant arqyly dánekerleý apparatyn satyp alyp, óziniń shaǵyn kásibin bastaı alady.
Jalpy, vıse-mınıstrdiń aıtýynsha, memleket bóletin shaǵyn nesıe somasy 2017 jyly 0-den 19 mln-ǵa deıin teńgeni qurady.
«Orta eseppen alǵanda bul soma qala nemese aýylǵa baılanysty 5-6 mln teńge sheginde aýytqıdy. Oǵan qosa, memleket jańadan bastaǵan kásipkerlerge nesıe somasynan 85%-ǵa kepildik beredi. Shaǵyn nesıeler nıet bildirgenderge «Bıznes Bastaý» baǵdarlamasy nemese basqa da baǵdarlamalar boıynsha oqyǵandyǵy týraly sertıfıkat bolǵan jaǵdaıda beriletinin aıta ketken jón. ShOB-pen aınalysatyn, sharýa qojalyqtaryna, fermerlerge shaǵyn nesıeler jańa jumys oryndaryn ashatyn bolsa beriledi», — dedi Nurjan Áltaev.
Eske salsaq, 5 naýryzda QR Parlamenti Palatalarynyń birlesken otyrysynda Memleket basshysy Nursultan Nazarbaev «Prezıdenttiń bes áleýmettik bastamasyn» jarııalaǵan bolatyn. Tórtinshi bastama shaǵyn nesıelendirýdi keńeıtýdi qarastyrady.