Shyǵysta alty aýdan men bir qala sý tasqynymen arpalysýda

Dál qazirgi ýaqytta óńirdiń 6 bir­deı (Aıagóz, Úrjar, Kúrshim, Ulan, Glý­bokoe, Zaısan) aýdany men oblys or­talyǵy – О́skemen qalasynyń tur­ǵyndary tótenshe apatpen arpaly­sýda. Ásirese kommýnaldyq sala qyz­met­kerlerinde tynym joq. Keshe aýa raıynyń qolaısyzdyǵyna baılanys­ty О́skemen men Rıdder qalasyndaǵy mektepterdiń 1-11 synyp oqýshylary, 1-2 kýrs stýdentteri sabaqtan bosatyldy. Oblystyq tótenshe jaǵdaılar departamentiniń baspasóz qyzmeti taratqan málimetterge súıensek, óńirdegi sý kirgen úılerdiń sany 100-den asyp ketken. Aıagóz aýdanynda 100 úı, О́skemende 8 úı men 27 aýla, Ulan aýdanynda 2 úı men 4 aýla, Glýbokoe aýdanynda 3 úı men 53 aýla, Kúrshim aýdanynda 42 aýla qarǵyn sýdyń qursaýynda qalǵan. Tótenshe jaǵdaılar departamenti, jergilikti polısııa qyzmetkerleri, «О́skemen Tártip», «Vodokanal», Shyǵys óńirlik aeroutqyr qutqarý jasaǵy ókilderi osy ýaqytqa deıin 1440 qumqap tósep, 15 000 tekshe metr sý sorypty. Erigen qar sýynyń jolǵa shyǵyp ketý oqıǵasy Kúrshim, Zaısan, Ulan jáne Úrjar aýdandarynda tirkelgen. Daǵdarys ortalyǵy janynan qurylǵan 1000 adamdyq apattyq-qutqarý tobynyń 536 ókili qazir apat saldarymen kúresýde. Sondaı-aq 137 tehnıka men 27 sý sorǵy qural jumyldyrylǵan.

Aıagózde 400 turǵyn qaýipsiz jerge kóshirildi

Qys boıy bolmaǵan qar óńirge aq­pan aıynyń aıaǵyn ala tópelete jaý­ǵany belgili. Buǵan naýryz aıynyń ba­syndaǵy jańbyr sýy qosylǵan. Budan keıin tasqyn bolmaǵanda qaıtsin?!

Dál qazirgi kezde joǵaryda aıtqan 6 aýdan men 1 qalanyń ishinde ásirese Aıagóz qalasynyń turǵyndaryna qıynǵa soǵyp tur. 11 naýryzda Aıagóz aýdany ákiminiń ókimimen Aıagóz qalasy boıynsha tabıǵı sıpattaǵy jergilikti aýqymdaǵy tótenshe jaǵdaı jarııalanǵan bolatyn. Aýdandyq ishki saıasat bóliminiń mamandary erigen qar men jaýyn-shashyn sýy 3 avtokólik, 5 jaıaý júrginshi ótkeli men 20-ǵa jýyq úıdi basyp qalǵanyn, sý alǵan úılerden 400 adam (onyń 30-y bala) qaýipsiz jerge kóshirilip, Aıagóz qalasyndaǵy qazaq mektep-lıseıine, №6 orta mektep-ınternatqa jáne týystarynyń úıine ornalastyrylǵanyn habarlaǵan edi. Keshe, ıaǵnı 12 naýryzda Aıagóz aýdandyq tótenshe jaǵdaılar bóliminiń basshysy J.Qalıevtan kelgen resmı aqparatta bul málimetterge birshama ózgerister engenin baıqadyq. Bólim basshysynyń bergen derekterine súıensek, sý basqan úıler sany – 100, buzylǵan úıler sany – 8, apatty úıler sany – 10. «Qazirgi ýaqytta jaǵdaı birshama turaqtaldy. 12 naýryz kúni aýdan ákimdiginde sý basqan úıler men zardap shekkenderdi anyqtaý úshin 4 top quryldy. Sonymen qatar qazir Shyǵys óńirlik aeroutqyr qut­qarý jasaǵynyń 16 qyzmetkeri 3 teh­nıkamen jáne osynsha qaıyq­pen Aıagóz ózeniniń jaǵasynda jumys istep jatyr. Keshe Aıagóz qalasyndaǵy №6 orta mektep-ınternatta ornalasqan adamdarǵa sý jetkizildi», delingen resmı málimette. Aıagóz aýdandyq ishki saıasat bóliminiń basshysy Medet Myrzykeshovpen telefon arqyly sóıleskenimizde, qurylǵan 4 top úılerdi aralap, shyǵyn kólemin anyqtaýmen shuǵyldanyp jatqanyn, kóshirilgen adamdar jatyn orynmen, tamaqpen qamtamasyz etilgenin aıtty. «Aýdandaǵy aqsaqaldar, jas­tar, basqa da turǵyndar qoldan kelgen kómekterin kórsetip jatyr. Qaladaǵy «Shokolod», «Báıterek» degen dámhanalarda tegin tamaq uıymdastyrylǵan», dedi ol.

Mamaı aýylyna jańa kópir salynady

Oblys ortalyǵy – О́skemende de jaǵdaı máz bolyp turǵan joq. 11 naýryz kúni qalanyń ortalyq kósheleri kólkigen sýdyń astynda qalyp, kóshege jaıylǵan sýdan adamdar túgil kólikterdiń ózi ázer ótken-di. Qarǵyn sý, ásirese shahardyń Krasın, Kúlenov, Shmelev log, Ahmer, Samsonov, Ablaket jáne Mırnyı eldi mekenderiniń turǵyndaryn áýrege salǵan-dy. Ablaket kentindegi Faızrahmanovtar otbasynyń osydan úsh jyl buryn ǵana salynǵan úıi sýǵa tolyp, múlde jaramsyz bolyp qalǵan edi. 11 naýryz kúni О́skemenniń ákimi Qýat Tumabaev kórshileriniń úıin panalap otyrǵan otbasy múshelerimen kezdesip, másele birjaqty bolǵansha, Dobrolıýbov kóshesinen ýaqytsha turatyn páter beriletinin jetkizdi.

Keshe qalada qalyptasqan jaǵdaımen aıaǵyna rezeńke etik kıip oblys ákimi Danıal Ahmetovtiń ózi arnaıy tanysyp shyqty. Krasın kenti men Ablaketka shaǵyn aýdandarynda qarǵyn sý basqan jeke úılerdiń turǵyndarymen kezdesip, pikirlerin tyńdady. Krasın kentindegi Kojedýb jáne Pýshkın kósheleri boıynda ornalasqan tórt úıdiń aýlasy aryq sýy arnasynan asqan soń 40 santımetrlik sý astynda qalypty. Jergilikti turǵyndardyń biri Andreı Tatarchenko ákimge mundaı jaǵdaıdyń oryn alýyna osy mańdaǵy aryq arnasynyń ýaqtyly tazalanbaýy sebep bolǵanyn aıtyp, muńyn shaqty. О́z kezeginde aımaq basshysy: «Sizder bir aryqtyń sýymen bir táýlik boıy alystyńyzdar. Aınaldyrǵan 4 úıdiń máselesin osynshama uzaq ýaqyt sheshe almaýlaryńyz aqylǵa syımaıdy. Byltyr qomaqty qarajat bólip, mundaı jaǵdaıǵa qajet tehnıka alýǵa járdemdeskenbiz. Sol tehnıkalar qaıda? Jalpy, mundaı jaǵdaıdyń qalyptasýyna tabıǵat qana emes, óz mindetterine salǵyrt qaraǵan keıbir laýazymdy tulǵalar da kináli», dep oblystyq tótenshe jaǵdaılar departamenti men qala ákimdiginiń jumysyn qatań synǵa aldy.

О́ńirde birneshe kún boıy tolastamaı jaýǵan jańbyr saldarynan Ulan, Aıagóz, Glýbokoe aýdandaryndaǵy birqatar ózender arnasynan asyp, mańaıdaǵy eldi mekenderge qaýip tóndirgen-di. Sondaı apatty jaǵdaı Ulan aýdanynyń Mamaı batyr aýylynda da qalyptasqan bolatyn. Ablaket aýyldyq okrýginiń ákimi Arslan Aǵylanbekovtiń aıtýynsha, jeksenbi kúni tańerteń aýyl shetimen aǵyp ótetin ózendegi sý deńgeıi kúrt kóterilip, eldi mekenge kireberistegi kópirdi basqan. Sonyń saldarynan aýyl men ózge eldi mekender arasyndaǵy baılanys úzilgen. Aýdan basshylyǵy men oblystyq tótenshe jaǵdaılar departamenti qabyldaǵan shuǵyl sharalar nátıjesinde bir táýlik ishinde jaǵdaı qanaǵattanarlyq deńgeıge jetkizilipti. Oblys ákimi bul aýyldaǵy jaǵdaıdy da óz kózimen kórip, jaqyn ýaqytta eldi mekenniń kireberisine jańa kópir salynatynyn aıtty.

Bet qattalyp jatqanda:

Kúrshim aýdanyndaǵy Kúrshim men Topterek aýyldarynyń arasyn jalǵaıtyn kópirdi sý shaıyp ketti degen sýyt habar jetti. Oblystyq tótenshe jaǵdaılar departamentiniń baspasóz qyzmeti qazirgi ýaqytta Kúrshim aýdandyq tótenshe jaǵdaılar bólimi, jergilikti polısııa men ákimdik Shyǵys óńirlik aeroutqyr qutqarý jasaǵy ókilderimen birlesip aýyl turǵyndaryn ózennen qaıyq arqyly ótkizip jatqanyn habarlady.

Azamat QASYM, «Egemen Qazaqstan»

Shyǵys Qazaqstan oblysy