Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýtynyń (KAZISS) uıymdastyrýymen Ortalyq kommýnıkasııalar qyzmetinde «5 Prezıdenttik bastama: áleýmettik memlekettiń qazaqstandyq úlgisi» taqyrybynda baspasóz máslıhaty ótti.
Is-sharaǵa Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýtynyń jetekshi sarapshylary – saıasattanýshylar, ekonomıster, áleýmettanýshylar jáne buqaralyq aqparat quraldary ókilderi qatysty.
«Qazaqstan Respýblıkasynyń Prezıdenti N.Nazarbaevtyń Parlament palatalarynyń birlesken otyrysynda jarııa etken «Prezıdenttiń bes áleýmettik bastamalary» Úndeýinde halyqtyń jaǵdaıy tómen toptary úshin turǵyn úıdiń qoljetimdiligin arttyrý, jalaqysy tómen qyzmetkerler úshin salyqty azaıtý, qazaqstandyq bilim berý júıesinde ońdy ilgerileýdi yntalandyrýǵa baǵyttalǵan joǵary bilim sapasy men qoljetimdiligin arttyrý, eldiń ortalyq jáne soltústik óńirlerindegi ekologııalyq jaǵdaıdy jaqsartý men damytýǵa baǵyttalǵan gazdandyrýdy jalǵastyrý sııaqty áleýmettik mańyzy bar máselelerge mán berdi. Jańa áleýmettik saıasat júrgizýdiń nátıjesi uzaq merzimdi nátıje berip, áleýmettik qaýipsizdikti qamtamasyz etedi», dedi Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýty dırektorynyń orynbasary Mádına Nurǵalıeva.
Prezıdent janyndaǵy Qazaqstan strategııalyq zertteýler ınstıtýtynyń bas sarapshysy Berik Ábdiǵalıuly atalǵan ınstıtýttyń negizgi mindeti el ishindegi saıası-áleýmettik máselelerge jan-jaqty taldaý júrgizý ekenin tilge tıek etip, Elbasy usynǵan bastamanyń negizgi erekshelikterine toqtalyp, búgingi tańda memleketimiz damyp, ekonomıkalyq áleýetimiz kóterilip, biraz jetistikterge jetkenin atap ótti.