Aıagóz aýdandyq Tótenshe jaǵdaılar bóliminiń basshysy Janat Qalıevtiń aıtýynsha, Aıagózdegi sý kirgen úıler sany - 148, 8 úı múlde jaramsyz bolyp qalsa, 10 úı apatty dep tanylǵan.
Qazirgi ýaqytta aýdan ákimdigi janynan qurylǵan 4 top shyǵyn kólemin anyqtap jatyr.
Oblys ákimi sý basqan úılerdiń turǵyndarymen kezdesti. Shyǵys Qazaqstan oblysynyń ákimi Danıal Ahmetov dál qazir Aıagózdegi sý basqan úılerdi aralap, turǵyndarmen kezdesip, pikirlerin tyńdap jatyr.
Aımaq basshysy turǵyndarǵa birde-bir adam nazardan tys qalmaıtynyn, arnaıy komıssııa 10 kún ishinde tıisti sheshim shyǵaratynyn, baspanasy jaramsyz bolǵandarǵa qalada salynyp jatqan 60 páterli úıden úı beriletinin nemese jańadan úı salynatynyn jetkizdi. Sonymen qatar, Aıagózge erteń 50 mıllıon teńge bólinetinin de málim etti. Danıal Ahmetovtiń aıtýynsha, bul qarjy Aıagózdegi tasqynnan zardap shekken turǵyndardyń kúndelikti qajetine jumsalady.
Azamat QASYM, "Egemen Qazaqstan"
Shyǵys Qazaqstan oblysy, Aıagóz aýdany