О́zbekstan prezıdenti Shavkat Mırzııoev qazaq aqyny Abaı Qunanbaıulynyń shyǵarmashylyq murasyn nasıhattaý týraly qaýlyǵa qol qoıdy. Bul týraly QazAqparat О́zbekstan prezıdentiniń saıtyna silteme jasap habarlady.
Qujatta uly aqyn jáne oıshyl Abaı Qunanbaıulynyń esimi men mol shyǵarmashylyq murasy qazaq halqynyń ǵana emes, barsha túrki halyqtarynyń, onyń ishinde ózbek halqynyń rýhanı damý tarıhynda óshpes iz qaldyrǵany aıtylǵan. Abaı Qunanbaıulynyń ómir joly, onyń qaıtalanbas shyǵarmashylyǵy Otanǵa, ulttyq jáne jalpy adamzattyń qundylyqtaryna degen adaldyqtyń jarqyn úlgisi bolyp qala beredi.
«Eki halyqtyń dostyǵy men baýyrlastyǵynyń nyǵaıýyna eleýli úles qosqanyn eskere otyryp jáne О́zbekstan qoǵamynyń qazaq ádebıeti men ónerin tereńirek tanýy úshin mádenı-gýmanıtarlyq baılanystardy damytý maqsatynda О́zbekstanda Abaı Qunanbaıulynyń shyǵarmashylyq murasyn keńinen zertteý men nasıhattaý týraly usynys maquldansyn», - delingen qujatta.
Qaýlyǵa sáıkes, uly aqyn jáne oıshyl Abaı Qunanbaıulynyń shyǵarmashylyq murasyn keńinen zertteý men nasıhattaý boıynsha uıymdastyrý komıtetiniń quramyn bekitý josparlanýda. Sondaı-aq, uıymdastyrý komıtetine bir aılyq merzimde sharalar tiziminiń josparyn ázirleý tapsyryldy.
Sonymen birge, qujatta Abaıdyń "Tańdamaly" shyǵarmalar jınaǵyn jáne «О́zbek-qazaq ádebı baılanystary» ádebı-saraptamalyq maqalalar jınaǵyn ázirlep, baspaǵa berý usynylǵan.
Nızamı atyndaǵy Tashkent memlekettik pedagogıkalyq ýnıversıtetindegi «Abaı jáne ózbek ádebıeti» kórmesin turaqty túrde uıymdastyrý jáne jyl saıyn 10 tamyzda - Abaıdyń týǵan kúninde Tashkenttegi aqyn eskertkishi janynda saltanatty sharalar ótkizý, oqýshylar men stýdentter arasynda «Abaı shyǵarmalarynyń bilgiri» shyǵarmalar baıqaýyn uıymdastyrý usynylyp otyr.
Odan bólek, aqynnyń ómiri men shyǵarmashylyǵy týraly maqalalar men tele, radıomaterıaldar ázirleý, oqý oryndaryndaǵy mektepterde, áskerı bólimder men ujymdarda taqyryptyq keshter ótkizý qarastyrylǵan.