Reseı halqy óz tańdaýyn jasady

V.Pýtın saılaýshylardyń 77 paıyzǵa jýyq daýsyn aldy. Iаǵnı 56 mıllıonnan artyq adam óz daý­syn V.Pýtınge bergen. Negizgi qarsylastary Pavel Grýdının 12, Vladımır Jırınovskıı 6, Ksenııa Sobchak 2 paıyzǵa jýyq daýys jınady. Bul saılaý daýys berýshilerdiń kóp bolýymen de erekshelendi, oǵan barlyq saılaýshylardyń 67 paıyzǵa jýyǵy qatysty. Al bul 73 mıl­lıonnan artyq adam degen sóz.

Daýys berý ýaqyty aıaqtalǵan soń ortalyq saılaý komıssııasynyń tóraǵasy Ella Pamfılova jýrnalısterge baspasóz konferensııa­syn ótkizip, saılaýdyń resmı qorytyndysy 10 kúnnen keıin shyǵatynyn aıtty. «Qorytyndy hattamany sonda shyǵaramyz, biraq ol qazirgi daýys bólinisine áser ete qoımaıdy», dedi tóraǵa.

Basym daýysqa ıe bolǵan V.Pýtındi kóptegen el­derdiń memleket basshylary qut­tyqtaýda, sonyń ishinde Qa­zaq­stan Prezıdenti Nursultan Nazarbaev ta óziniń quttyqtaýyn jiberdi.

Bul saılaýdyń ereksheligi sol, oǵan degen halyqtyń qyzy­ǵý­shylyǵy aıryqsha boldy. Ná­tıjeniń qandaı bolatynyn jurt­tyń bári jobalasa da Pýtın­nen basqa jeti úmitkerdiń qaty­sýymen ótip, barlyq telearnalarda kórsetilgen pikirsaıystar saılaýdyń kórigin qyzdyryp, halyqtyń bar nazaryn ózine aýdardy. Ásirese, buryn saıasatqa belsene aralaspaǵan Grýdının, Sobchak sııaqty úmitkerler saılaýdyń qazanyn burqyldata qaınatýǵa úlken úles qosty. Buryn saıasattyń aldyńǵy shebinde júrse de keıin odan alshaqtap ketken Iаvlınskıı, Babýrın sııaqty úmitkerler de saılaý dodasynda jańa qyrynan jarqyraı kórindi.

Reseı Federasııasynda bar­lyǵy 100 mıllıondaı saılaýshy bar eken, olardyń 60 paıyz­dan artyǵy 96 myńnan artyq saılaý ýchaskelerine kelip daýys berdi. Bul 2012 jylmen salystyrǵanda áldeqaıda artyq. Reseı Federasııasynyń álemniń 145 elinde júrgen azamattary úshin 393 saılaý ýchaskesi ashyldy. Sonyń ishinde Qazaqstanda Re­seı Federasııasynyń elshiligi men konsýldyqtary, ókildigi bar qala­larda da saılaý ýchaskeleri jumys istedi.

Osy saılaýǵa Vladımır Pýtın bılik basyndaǵy «Edınaıa Rossııa» partııasynyń atynan emes, ózin-ózi usynǵan úmitker retinde qa­tysty. Vladımır Jırınovskıı ózi­niń «LDPR», Ksenııa Sobchak «Aza­mat­tyq bastama», Borıs Tıtov «О́sý par­tııasy», Pavel Grýdının «KPRF», Grıgorıı Iаvlınskıı «IаBLOKO»,Sergeı Babýrın «Reseı­diń búkilhalyqtyq odaǵy» jáne Maksım Sýraıkın «Reseı kom­mý­nısteri» partııalarynyń atynan tústi.

Halyqaralyq uıymdar men she­telderden kelgen baıqaýshylar sany da bul joly rekordtyq kór­setkishke jetken. 115 elden kelgen 1513 baıqaýshy federasııanyń 59 sýbektisinde óz jumystaryn júrgizdi. Sonyń ishinde eń kóp baıqaýshy jibergen el Qazaqstan boldy. Bizden barǵan baıqaýshylar sany – 223. Qazaqstan baı­qaý­shylary TMD, EQYU, ShYU, TMD Parlamentaralyq assambleıa­sy sııaqty halyqaralyq uıymdar delegasııalarynyń quramynda qyzmetterin atqardy. Al Reseıdiń ózinen saılaýdy baqylaýǵa 474,5 myń baıqaýshy qatysqan. Sonymen qatar 10,5 myń BAQ ókili saılaý barysyn jarııalap otyrdy.

Qoǵamdyq pikirlerdi zertteý ortalyqtarynyń, sonyń ishinde Búkilreseılik qoǵamdyq pikirlerdi zertteý ortalyǵynyń (VSIOM) aldyn ala zerdeleýlerine qaraǵanda V.Pýtınge – 69, Grýdınınge – 7, Jırınovskııge – 5, Sobchakqa – 0,7-den 2 paıyzǵa deıin, Iаvlınskıı men Babýrınge – 1, Tıtov pen Sýraıkınge bir paıyzdan tómen daýys beriledi dep boljanǵan. Pikir zertteýshilerdiń boljamy naqty nátıjeden alysqa ketpegenimen, bir­shama keıindep qaldy. Sonyń ishinde 69 paıyz alady degen V.Pý­tın 77 paıyzǵa jýyq daýys jınady.

Saılaý barysynda ortalyq saı­laý komıssııasynyń elektrondy derekterine 15 elden hakerlik sha­býyl jasalǵany týraly da aı­tyldy. Biraq olar saılaýdyń derekterin buza almaǵan.

Jaqsybaı SAMRAT, «Egemen Qazaqstan»