Qazaq yrymshyl halyqpyz ǵoı aqty molshylyq pen tazalyqqa teńeıtin. Naýryz meıramyn toılaý qarsańynda Aqmola oblysynyń ortalyǵy Kókshetaý qalasynda qar molynan jaýdy. Naýryz meıramyn toılaýǵa daıyndyq tań atpastan bastalyp ketýi de sondyqtan. Qala kóshelerin túni boıy jaýǵan qardan arshý úshin barlyq tazalaý mekemeleri jumyldyrylyp, der kezinde negizgi kósheler tazartyldy.
Osylaısha bastalǵan Naýryzdy toılaý óziniń sán-saltanatymen jáne ádemi bezendirilýimen kópshiliktiń kóńilinen shyqty desek artyq aıtqandyq emes. Merekelik sharany atap ótý úshin Abylaıhan alańyna 1500 adam kelgendigin aıta ketý kerek. О́ıtkeni osy alańǵa Aqmola oblysynyń iri kásiporyndary men uıymdary kıiz úılerin tikken bolatyn. Sonyń ishinde «Kókshetaý mıneraldy sýlary» AQ, Sh.Ýálıhanov atyndaǵy KMÝ, «AltýntauKokshetau» AQ, «QTJ» UK» AQ Aqmola bólimshesi jáne ózgeleri de bar. Árbir aqshańqan kıiz úıde mol dastarqan jaıylyp, kelgen qonaqtarǵa dám tattyryp jatty. Al sharanyń ózi «Tarıh kerýen» teatrlanǵan kórinisinen bastaldy. Baǵdarlamanyń ózi toǵyz aıshyqty kórinisten: «Rýhanı jańǵyrý», «Tumar», «Altyn adam» «Qydyr ata», «Naýryzkóje», «Kókshe aqyndary», «Qazaqstan halqy Assambleıasy», «Qazaqstan jastary» jáne «Meniń júregim – Astana». Qala turǵyndary men qonaqtary jınalǵan qaýymnyń aldyna shyqqan Aqmola oblysynyń ákimi Málik Myrzalın quttyqtaý sóz sóıledi.
– Kóne zamannan beri aıshyqty Naýryz merekesi beıbitshilik pen órkendeýdiń, gúldený men molshylyqtyń merekesi sanalsa, táýelsizdigimizdi alǵannan keıin jańa tynysyn aldy. Bizdiń óńirimiz Naýryzdy úlken jetistiktermen qarsy alyp otyr, sondyqtan da barlyq aqmolalyqtarǵa tynymsyz da jemisti jumystaryńyz úshin rızashylyǵymdy bildirgim keledi, – dedi óńir basshysy aǵynan jarylyp.
Artynan oblys basshysy tusaýkeser rásimine qatysyp, Haıdar Shabanovtyń tusaýyn kesti. Tabıǵattyń túlep, jańa jyldyń bastalýymen aıaǵyn endi táı-táı basqan balanyń tusaýyn kesý arqyly osylaısha jańa ómirdiń bastalǵandyǵyn bildirgen rásim merekege ózindik maǵynasyn kirgizdi. Kıiz úıler tigilgen qalashyqty aralap kórgen Málik Myrzalın osynda qurmetti azamattarmen, eńbek ardagerlerimen «Rýhanı jańǵyrý» ulttyq baǵdarlamasy men Qazaqstan Prezıdentiniń bes áleýmettik bastamalaryn júzege asyrý, sondaı-aq tórtinshi ónerkásiptik revolıýsııa jaǵdaıynda óńirimizdi damytý múmkindikteri týraly pikir almasty. Al «Naýryz – mereke!» konserttik baǵdarlamasy qazaqstandyq juldyz Álisher Kárimovtiń, «Dejavıý» tobynyń, «Qara gaýhar» jáne Kókshetaý qalasynyń ózge de shyǵarmashylyq ujymdarynyń qatysýymen ótti. Budan basqa, Táýelsizdik alańynda ulttyq jáne sporttyq is-sharalar ótkizildi. Osylaısha Naýryz meıramy óziniń sán-saltanatymen jáne erekshe tartymdylyǵymen qala turǵyndary men qonaqtaryn tánti etti.
Asqar TURAPBAIULY,
«Egemen Qazaqstan»
Aqmola oblysy