Búgin QR Premer-Mınıstri Baqytjan Saǵyntaev OQO-ǵa jumys sapary aıasynda Shymkenttegi oblystyq klınıkalyq aýrýhanaǵa bardy jáne adam kapıtalynyń sapasyn jaqsartýǵa baǵyttalǵan «Qazaqstannyń úshinshi jańǵyrýy: jahandyq básekege qabilettilik» Joldaýynyń tórtinshi basymdyǵyn iske asyrý máseleleri boıynsha oblystyń densaýlyq saqtaý salasynyń qyzmetkerlerimen kezdesý ótkizdi.
Kezdesý barysynda densaýlyq saqtaý júıesin damytýdyń ózekti máseleleri talqylandy. Atap aıtqanda, aýrýlardy basqarý baǵdarlamalaryn sıfrlandyrý jáne ázirleý, aýrýlardy emdeýden ýaqytyly aýrýlardyń aldyn-alýǵa kóshý, mindetti medısınalyq saqtandyrýdy engizý, kadrlardy daıarlaý, densaýlyq saqtaý naryǵyn yryqtandyrý jáne jekemenshik uıymdardyń ákimshilik kedergilerin azaıtý, ınvestısııalar tartý, ınfraqurylymdy jetildirý jáne memlekettik-jekeshelik áriptestikti damytý.
QR Premer-Mınıstri Baqytjan Saǵyntaev Úkimet atalǵan máselelerdiń barlyǵyn erekshe baqylaýda ustap otyrǵanyn atap ótti. 2017 jyly jeke sektorǵa qoıylatyn shekteýler 1,7 ese joıyldy. Bul densaýlyq saqtaý salasyna salynatyn jeke ınvestısııalardy eki esege — 44,2 mlrd teńgege deıin ulǵaıtýǵa jol ashady. MÁMS júıesin engizý boıynsha júıeli jumystar jalǵasýda: zańnamalyq baza quryldy, ótken jyldan bastap qor jumys isteı bastady, jumys berýshiler aqsha aýdarymdaryn júrgizip jatyr.
Budan ózge, Prezıdenttiń bes áleýmettik bastamasy aıasynda berilip jatqan múmkindikter talqylandy. Bul — tıimdi sharttar boıynsha turǵyn úı satyp alýǵa múmkindik beretin «7–20–25» jańa ıpotekalyq baǵdarlamasy, jáne halyqtyń jekelegen toptaryna 2019 jyldyń 1 qańtarynan bastap salyq júktemesiniń 10 esege – 1%-ke deıin tómendeýi.
Densaýlyq saqtaý vıse-mınıstri Lázzat Aqtaeva densaýlyq saqtaý júıesin jetildirý salasynda qabyldanyp jatqan sharalar týraly egjeı-tegjeıli baıandap berdi.
Sondaı-aq, talqylaý barysynda oblystyń medısına qaýymdastyǵynyń ókilderi: densaýlyq saqtaý basqarmasynyń basshysy M. Egizbaev, №6 qalalyq emhananyń bas dárigeri G. Kólbaeva, jekemenshik emhana ókili Ý. Orynbaeva, týbdıspanserdiń bas dárigeri B. Saǵynbekov pikir bildirdi.