«Memleket tarapynan kórsetiletin qyzmetter meılinshe ońtaılandyrylyp, adamnyń barýyn qajetsinbeıtin tolyq elektrondyq formatqa kóshirilip jatyr. 45 aýyldyq okrýgtyń ákimdikterinde arnaıy qyzmet buryshy ashylyp, onda nusqaýshy maman jumys isteýi tıis».
Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti osyndaı bastama kóterip, bul jumys jergilikti jerlerde iske asyp jatyr.
Aqtaý qalasy ákimdiginde ótken «Memlekettik qyzmetter kórsetý máseleleri jóninde vedomstvoaralyq jumys tobynyń» kóshpeli otyrysynda osy másele aıtyldy.
Jıynǵa Ulttyq qaýipsizdik komıteti shekara qyzmetiniń 2018 áskerı bólimi, ishki ister departamenti, kásipkerler men jergilikti atqarýshy organdardyń ókilderi qatysty. Departament basshysynyń orynbasary Erlegen Mendalıev 2017 jyly vedomstvoaralyq jumys tobynyń atqarǵan jumystary týraly baıandady.
Sonymen qatar, shaǵyn kemelerdiń (quraldardyń) jáne muz ústimen jyljıtyn tehnıka túrleriniń Qazaqstan Respýblıkasynyń aýmaqtyq sýlaryna (teńizine) jáne ishki sýlaryna shyǵýǵa ruqsattamalar berý máselesi de talqyǵa tústi. Aqtaý qalasy ákimdigi bul máseleniń qazir tyńǵylyqty zerdelenip jatqanyn jetkizdi. Otyrysta Aqtaý qalalyq bilim bólimi basshysynyń kórsetiletin qyzmet túrlerin jetildirý baǵytyndaǵy esebi de tyńdaldy.
Buǵan qosa, vedomstvoaralyq jumys tobynyń músheleri jáne otyrysqa qatysýshylarǵa «Memlekettik qyzmetshiniń ádebi jáne minez-qulyq normalarynyń jıyntyǵy» kitapshasynyń kúndelikti jumystaǵy mańyzdylyǵy túsindirildi. Vedomstvoaralyq jumys toby kásipkerlerge qolaıly jaǵdaılar jasaý maqsatynda, memlekettik organdarǵa qyzmet sapasyn arttyrý boıynsha usynymdar ázirlendi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy