Shyǵys Qazaqstan jurtshylyǵynyń qarǵyn sýmen arpalysyp jatqanyna bir aıǵa jýyqtapty. Dál qazirgi ýaqytta ásirese Zyrıan aýdanyna qıyn soǵyp tur.
29-30 naýryz kúnderi aýdanda tasqyn saldarynan 414 úıdi sý basyp, 811 adam qaýipsiz jerge kóshirilgen-di. Búginde 474 adam úılerine oralsa, 34 adam evakýasııalyq beketterdi, 303 adam týystaryn panalaýda. Eń qıyny sol, aýdanda 129 úı tórt-bes kúnnen beri sý astynda qalyp otyr. Búgin oblys ákimi Danıal Ahmetov tikushaqpen Zyrıan aýdanyna arnaıy baryp, sý basqan úılerdi kórip, evakýasııalyq beketterge ornalasqan turǵyndarmen kezdesip, hal-jaǵdaılaryn bilip qaıtty.
Aımaq basshysy áýeli Maleev aýylyna kire beristegi kópirdiń janynda turǵyzylyp jatqan bóget qurylysymen tanysty. Bul jerde 1, 2, 3 sáýir kúnderi Buqtyrma ózeniniń muzyn jarý jumystary júrgizilgen eken. О́zen jaǵasyndaǵy úlkendigi 4-5 metrlik muz kesekterinen-aq munda tasqynnyń ekpini qanshalyqty bolǵandyǵyn ańǵarý qıyn emes. Zyrıan aýdany ákiminiń sý tasqyny jónindegi arnaıy top basshysy Amangeldi Tymbaevtyń aıtýynsha, 31 naýryzda úsh kún toqtaýsyz jaýǵan jańbyrdan ózendegi sý deńgeıi 7 metrge deıin jetip, kópirden asyp, aýylǵa qaýip tóngen. Qazirgi ýaqytta mundaǵy sý deńgeıi 3 metrge deıin tómendegen.
D.Ahmetov Zyrıan qalasyndaǵy 4-5 kúnnen beri sý astynda tóbesi ǵana qyltıyp turǵan úılerdi de kórdi. Bul jerde qazirgi ýaqytta 74 úı sý astynda qalyp otyr. Tótenshe jaǵdaı salasy mamandary mundaǵy sý deńgeıi 2 metr shamasynda bolyp turǵanyn, úsh táýlikte sý deńgeıi 30 santımetrge tómendegenin aıtady. Oblys ákimi bir-eki kún kóleminde sýdy sorý jumystaryn aıaqtaýdy tapsyrdy.
Qazirgi ýaqytta óńirde tasqynnan zardap shekken qalalar men aýdandarda qalpyna keltirý jumystary júrgizilip jatqany belgili. Jalpy, 9 naýryzdan bergi aralyqta aımaqta 1371 úıdi sý basyp, 3004 adam qaýipsiz jerlerge kóshirilipti. Onyń 2212-si úılerine oralsa, 240 adam evakýasııalyq beketterdi panalaýda. Qazir oblysta memlekettik qyzmetkerler, kásiporyn jumysshylary men stýdentterden quralǵan 3492 adam, 603 kásibı maman men 488 tehnıka apatty aýyzdyqtaý, aýla-úılerdi tazartý sharalaryna jumyldyrylǵan.
Búgin О́skemende óńirdegi tasqyn jaǵdaıyna baılanysty jıyn ótkizgen D.Ahmetov oblys ortalyǵynda 11, Aıagózde 52, Glýbokoede 21, Shemonaıhada 16, Katonqaraǵaı aýdanynda 4 úı turýǵa jaramsyz dep tanylǵanyn, Semeı men Zyrıanda arnaıy komıssııa jumys istep jatqanyn, aldyn ala esepteýler boıynsha tasqynnan kelgen shyǵyn kólemi 3,2 mıllıard teńgeni qurap otyrǵanyn aıtty.
Azamat QASYM,
«Egemen Qazaqstan»
Shyǵys Qazaqstan oblysy
Sýretterdi túsirgen avtor