Mark Sýkerberg Facebook-tiń tóraǵalyǵynan ketýi kerek pe?

Makronnyń bastamasyna qarsy ereýilge shyqty 

Fransııa prezıdenti Emanýel Makronnyń memlekettik kólik salasyn tolyǵymen jańǵyrtý jumystaryn júrgizý týraly bastamasyna qarsy bolǵan temirjolshylar ereýilge shyqty. Bul Fransııadaǵy prezıdentke qarsy eń iri ereýilderdiń biri.

Buqaralyq aqparat quraldary «Qara seısenbi» dep ataǵan ereýil Fransııanyń 4,5 mln temir jol jolaýshylaryna kedergi keltirgen. Sebebi poıyz júrgizýshileriniń 75 paıyzy, qyzmetkerlerdiń 33 paıyzy jumystaryn toqtatqan. Ereýildiń birinshi kúni tek aımaqtyq 5 poıyzdyń bireýi jáne 8 joǵary jyldamdyqty TGV poıyzynyń bireýi ǵana jumys istedi.

Jumysshylar 28 maýsymǵa deıin bir aptanyń eki kúninde memleket boıynsha temir jol qyzmetin toqtatpaq. Osylaısha olar prezıdenttiń memlekettiń temir jol júıesin ózgertý týraly bastamalaryna qarsy ekendikterin bildirdi. Temirjolshylardyń aıtýynsha, Úkimet jańa reforma arqyly olardyń eńbek quqyqtaryn shektep otyrmaq. Al Makron men Úkimet temirjolshylardyń ómir boıy kepildik alyp, jyl saıyn eńbekaqylarynyń avtomatty túrde ósip otyratyny ádiletsiz ekenin aıtty. Sonymen qatar olardyń erte zeınetke shyǵýyn da toqtatý kerek degen usynysyn jetkizdi. Al Fransııa premer-mınıstriniń aıtýynsha, halyqtyń temir jol júıesine kóńili tolmaıdy.

BUU: Álemdegi gýmanıtarlyq daǵdarystyń eń soraqysy

BUU-nyń Bas hatshysy Antonıo Gýtterısh Iemendegi soǵysty álemdegi gýmanıtarlyq daǵdarystyń eń soraqysy dep atady. Onyń aıtýynsha, ondaǵy 22 mln adamǵa – halyqtyń tórtten úshine kómek kerek jáne mıllıondaǵan halyq taza sýdy tutyna almaı otyr. «Iemende holera epıdemııasy jıi kezdesedi. Munda árbir on mınýt saıyn balalar aýrýdan qaıtys bolady. Tipti 18 jasqa tolmaǵan qyzdardyń úshten ekisi tur­mys qurǵan», dedi A.Gýtterısh Jenevadaǵy konferensııada. Bas hatshynyń aıtýynsha, Iemenge BUU 2,96 mlrd dollar gýmanıtarlyq kómek kórsetý kerek bolǵan, biraq bul mindet oryndalmaǵan. Degenmen BUU jospary boıynsha AQSh 930 mln dollar bólgen jáne óńirge qosymsha taǵy 500 mln dol­lar berýge daıyn ekenin aıtqan.

Mark Sýkerberg Facebook-tiń tóraǵalyǵynan ketýi kerek pe?

Nıý-Iorktiń zeınetaqy qoryna quıylatyn ınves­tı­sııalardy baqylaıtyn Skott Strınger Mark Sýker­berg Facebook tóraǵalyǵynan ketýi kerek degen pikir bildirdi. Cambridge Analytisa daýynan keıin ol Facebook keńesine osy máseleni qaraý týraly usynys bildirdi. 

Nıý-Iorktiń zeınetaqy qory Facebook-tiń 1 mlrd dollaryna ıelik etedi. Qor basshysy Sýkerbergti jáne úsh dırektordy táýelsiz tóraǵa almastyrýy kerektigin aıtty. «Áleýmettik jeliniń 2 mlrd tutynýshysy bar. Olar óz málimetteriniń qorǵalǵan-qorǵalmaǵanyn naqty bilmeıdi, ári senbeıdi», dedi ol. Sondaı-aq Strınger qor Facebook-tegi óz qarjysyn qaıtaryp alatynyn aıtty. 

Árıne Sýkerberg basshy retinde barlyq aksıonerlerdi ózi basqarady. Biraq Cambridge Analytica ınvestorlarǵa ózgeris engizýdi talap etýge jaqsy múmkindik týǵyzyp otyr. 

Daıyndaǵan Gúlnur QÝANYShBEKQYZY, «Egemen Qazaqstan»