Meksıkada esirtki karteli jetekshisiniń qazasynan keıin bastalǵan jappaı tártipsizdikterge baılanysty halyqaralyq sport qaýymdastyǵy alańdaýly. Alaıda ázirge 2026 jylǵy fýtboldan álem chempıonaty matchtarynyń jarys kestesin ózgertý týraly resmı sheshim qabyldanǵan joq. FIFA Meksıkadaǵy jaǵdaıdy jiti baqylap otyr. Bul týraly The Athletic basylymy habarlady, dep jazady Egemen.kz.
Meksıkalyq «Jańa býyn Halısko» (CJNG) esirtki karteliniń jetekshisi Nemesıo Rýben Osegera Servantes (laqap aty El Mencho) óltirilgennen keıin eldiń birqatar aımaǵynda tártipsizdik órshidi. Qarýly toptar joldardy jaýyp, avtokólikterdi, bankter men dúkenderdi órtegen. Tolqýdyń negizgi oshaqtarynyń biri – Halısko shtaty. Onyń ákimshilik ortalyǵy – Gvadalahara qalasy 2026 jylǵy álem chempıonatynyń toptyq kezeń oıyndaryn qabyldaýy tıis.
Meksıkada atyshýly qylmystyq toptyń jetekshisiniń qazasynan keıin jappaı tártipsizdik bastaldy
Tártipsizdikter saldarynan Meksıka fýtbol lıgalaryndaǵy birneshe match keıinge shegerildi. Jankúıerlerge stadıondarǵa kelmeý jóninde eskertý jasalyp, keıbir komandalar men oıynshylar alańnan evakýasııalanǵan. Osyǵan baılanysty FIFA Gvadalaharadaǵy ahýaldy erekshe baqylaýǵa alǵan. Degenmen álem chempıonaty oıyndaryn basqa qalaǵa aýystyrý nemese týrnır kúntizbesine ózgeris engizý jóninde resmı málimdeme jasalǵan joq.
«Ordabasy» fýtbol klýby jekemenshikke satyldy
CBS News taratqan derekke sáıkes, El Menchonyń kózin joıýdan keıingi qaqtyǵystarda 73 adam qaza tapqan. Meksıkanyń qaýipsizdik mınıstri Omar Garsııa Harfýhtyń málimdeýinshe, Halısko shtatynda 6 bólek shabýyl barysynda Ulttyq gvardııanyń 25 áskerı qyzmetkeri mert bolǵan. Sonymen qatar shamamen 30 kúdikti qylmystyq top múshesi joıylyp, taǵy 4-eýi kórshiles Mıchoakan shtatynda óltirilgen. Halısko, Mıchoakan jáne Gýanahýato shtattarynyń bıligi jeksenbi kúni keminde 14 adamnyń qaza tapqanyn, olardyń 7-eýi áskerı qyzmetker ekenin habarlady.
Qalyptasqan jaǵdaı álemdik dodany uıymdastyrýǵa áser ete me, joq pa, bul aldaǵy ýaqyttyń enshisinde. Ázirge halyqaralyq fýtbol uıymy qaýipsizdik máselesin basty nazarda ustap otyrǵanyn málimdeýmen shekteldi.
«Atyraý» fýtbol klýby qansha teńgege satylýy múmkin?