Memleket basshysy Kenııa Prezıdentimen shaǵyn quramda kelissóz júrgizdi

«Bul memleketterimizdiń arasyndaǵy yntymaqtastyqty nyǵaıtýǵa nıetti ekenińizdi kórsetedi. Kenııa – Afrıkadaǵy óte mańyzdy seriktesimiz. Sizdiń elińiz qurlyqta saıası jáne ekonomıkalyq turǵydan qarqyndy damyp keledi. Kóptegen baǵytta yqpaldastyǵymyzdy keńeıtýdiń tyń múmkindikteri bar. Biz buǵan qýanyshtymyz. Ony tabysty túrde ilgerilete alatynymyzǵa senimdimin. Búgin ekijaqty ekonomıkalyq jáne gýmanıtarlyq yntymaqtastyq perspektıvasyn talqylaımyz. Naırobı Afrıkadaǵy halyqaralyq ortalyq retinde tanylǵany málim. Onda BUU júıesindegi uıymdar ornalasyp, turaqty jumys istep keledi. Osyǵan baılanysty Qazaqstan Naırobıde elshilik ashý týraly sheshim qabyldaǵan bolatyn», dedi Qazaqstan Prezıdenti.

Ýılıam Rýto Kenııa Qazaqstandy saýda men ınvestısııany damytýdaǵy mańyzdy logıstıkalyq hab retinde qarastyratynyn atap ótti.

«Qazirdiń ózinde elderimiz arasyndaǵy taýar aınalymynda ósim baıqalady. Biz Qazaqstan arqyly negizgi aýylsharýashylyq ónimderimizdi Eýrazııa naryǵyna eksporttaýǵa nıet tanytyp otyrmyz. Sapar aıasynda elderimiz arasyndaǵy yntymaqtastyqty tereńdetýge qajetti quqyqtyq negiz qalap, tyń múmkindikterge jol ashatyn birqatar qujatqa qol qoıamyz», dedi Kenııa Prezıdenti.

Aıta keteıik, Táýelsizdik saraıynda Kenııa Prezıdentin resmı qarsy alý rásimi ótti.