Dıqandar úshin kóktemniń ár kúnin tıimdi paıdalaný mańyzdy. Bıyl Ońtústik Qazaqstan oblysynda aýyl sharýashylyǵy daqyldarynyń egis kólemi 833,1 myń gektar bolady dep mejelenip otyr. Búginge 12,4 myń gektarǵa jazdyq daqyldar, onyń ishinde 6,2 myń gektar kókónis, 0,4 myń gektar arpa, 3 myń gektar jońyshqa, 2,1 myń gektarǵa kartop egilgen.
Kóktemgi dala jumystary, ásirese, Maqtaaral, Saryaǵash aýdandarynda qyzý júrgizilýde. Maqtaaral aýdany boıynsha 137959,6 gektar egistik alqaptyń 11425,0 gektary tyrmalanyp, 7327,0 gektary jumsartylǵan. Qajetti tehnıka, qural-saımandarmen tolyq qamtamasyz etilgen dıqandar 997,1 gektarǵa jańa jońyshqa, 931 gektarǵa erte pisetin kókónis, 855,5 gektarǵa qyryqqabat daqylyn ekti. Baqsha ósirýshiler de kóktemgi egiske erte bastan qamdanyp,1723 gektarǵa qarbyz, 3120 gektarǵa qaýyn tuqymyn egipti. Aýyldar arasyndaǵy beıresmı jarysty da ańǵarýǵa bolady. Kórshisi erte oıanǵan aýyl qazaǵy uıyqtap jatpasy anyq. Bul oraıda, Dostyq, Sh.Dildábekov aýyldyq okrýgteriniń dıqandary jańa jońyshqa, qarbyz egýde alda keledi. Erte kókónis ósirýde, onyń ishinde qyryqqabat egý boıynsha Atameken, Maqtaaral aýyldyq okrýgteriniń dıqandary kósh bastapty. Árbir aýyl okrýgterinde qurylǵan jumysshy brıgadalary dıqandarmen kelisip, jaldamaly negizde jumys isteýde. Negizgi daqyly "aq altyn" bolyp sanalatyn maqtaraldyq sharýalar jerge maqta shıtin sebýge de daıyndyqtaryn jasaýda.
Al Saryaǵash aýdanynda bıyl 13 myń 700 gektar jerge kókónis egilgen. Birtilek aýyldyq okrýgindegi «Nurjan» sharýa qojalyǵy 1,6 gektar jylyjaıǵa qulpynaı ósirýde. Sharýashylyqta 30 adam jumyspen qamtylǵan. Sharýa qojalyǵy 1 maýsymda 50 tonna kóleminde qulpynaı óndirýdi josparlap otyr. Qyzanaq jáne qııar ósirýmen aınalysatyn «Fahrıtdın» sharýa qojalyǵy da bıyl ónim kólemin arttyrý maqsatynda jumys isteýde. Jylyna 250 tonna ónim óndirip otyrǵan qojalyqta 25 adam turaqty jumyspen qamtylǵan. Maýsym kezderinde jumysshylar sany 2 esege deıin artady.
Erkin DOSYMBAI,
Ońtústik Qazaqstan oblysy