Qazaqstan quramasynyń senim artyp otyrǵan lıderi Mıhaıl Kýkýshkın «Egemen Qazaqstan» tilshisine suqbat berdi.
– Siz osyǵan deıin Borna Chorıchpen 2 ret kezdesip ekeýinde de jeńiske jettińiz. Erteńgi oıynda bul jaǵy qalaı áser etedi?
– Osydan 2 jyl buryn kezdestik. Ekeýinde de jeńdim. Eki kezdesý de qum tósenishinde ótti. Biraq, Borna ol kezde bolashaǵynan úmit kúttiretin jas bala edi. Ol kezde jeke óz atymnan oınasam, bul joly Qazaqstan quramasynyń namysyn qorǵaımyn. "Devıs kýbogy" sonysymen de erekshelenedi. Qazir ol jetildi. О́sti. Men qatysyp júrgen týrnırlerde menen joǵary oryndar ıemdenip júr. Erteń bolatyn oıyn múlde basqasha ótedi dep aıta alamyn. Tipti, sý jańa buryn kezdespegen qarsylaspen shyqqaly turǵandaımyn. Onyń ústine ol erteń óz alańynda oınaıdy, al men syrtta.
– Qurama komanda sapyna sál keshigip kelgenińiz kedergisin keltirmeı me?
– Kóp keshiktim dep aıta almaımyn. Qurama Varajdınge kelgen soń ertesine men de jettim. Onyń ústine Borna Chorıch pen Marın Chılıchter de men sekildi AQSh-taǵy týrnırde boldy. Qarsylastarmen ol jaǵynan birdeımiz. Muhıttyń arǵy jaǵynda hard tósenishte oınasaq, bul joly qumda kezdeskeli turmyz. Az ýaqyttyń ishinde jyldam úırenisip alamyz degen úmittemin.
Ermuhamed Máýlen,
«Egemen Qazaqstan»
Varajdın, Horvatııa.