Bastaýyn sonaý 1900 jyldan alatyn ǵasyrdan astam tarıhy bar týrnırdiń bıyl sońǵy saıysy ótkeli tur. Sebebi, tamyz aıynda Halyqaralyq tennıs qaýymdastyǵy «Devıs kýbogy» jarysynyń ótý júıesin ózgertip, Álem chempıonaty deńgeıine kótermek. Tarıhı týrnırde bizdiń qurama qandaı jetistikke jetýi múmkin?
«Devıs kýbogynyń» sońǵy jarysy ma?
Sońǵy 10 jyldyń kóleminde Qazaqstan tennıs qaýymdastyǵy qyrýar sharýa atqardy. Eldegi tennısti damytý úshin kóptegen baǵdarlamalar qabyldady. Keıinnen ulttyq quramanyń deńgeıin kóterdi. Árıne, kileń syrttan kelgen tennısshiler óner kórsetti dep synaǵandar da boldy. Alaıda, sol arqyly reıtıngimiz kóterilip, el tennısine keremet jarnama jasaldy. Elimizdiń aty da álemdik arenada talaı márte tańdanyspen aıtyldy. Álgi, «Astana» velokomandasy men «Astana» fýtbol klýby sekildi Qazaqstan atyn, el brendin qalyptastyrý maqsatynda tennısshilerimizdiń de sińirgen eńbegi orasan zor dep aıtar edim. Mysaly, «Devıs kýbogynda» Qazaqstan Shveısarııa, Belgııa, Italııa, Argentına sekildi tegeýrindi quramalardy jeńdi emes pe?
Al qazir komanda sapyna birtindep el tennısiniń túlekteri alyna bastady. Qazirgi quramamyzdy qarańyz: Dmıtrıı Popko, Roman Hasanov, Dmıtrıı Evseev, Tımýr Habıbýllın. Barlyǵy Qazaqstan tennıs mektebiniń túlekteri. Olarǵa tájirıbıeli degen Mıhaıl Kýkýshkın men Aleksandr Nedovesovti qosamyz.
Al endi osyndaı júıede ótetin sońǵy «Devıs kýbogy» bizdiń jigitter úshin qalaı bolmaq? Sońǵy ekeni árıne, ázirge belgisiz. Alaıda, tennıs salasynda júrgender biraýzdan týrnırdiń túr-álpeti túgel ózgeretinin aıtady. Endi bir ǵana elde, bir aptanyń ishinde óte shyǵatyn tennıs toıyna aınalady. Iаǵnı, kádimgi fýtboldyń mýndıali sekildi Álem chempıonaty bolyp ózgermek. Iriktelip kelgender, kim myqtyny anyqtaıtyn bolady.
Bıylǵy jarys jolymyz jaıly qozǵasaq, aldymen Argentınany jeńip, Álemdik topqa túsken soń, qarsylasymyz Shveısarııa boldy. Federer quramaǵa oınamaımyn dedi, Vavrınka jaraqat aldy, áıteýir olardy da utyp jarystyń shırek fınalyna joldama aldyq. Al endigi qarsylas – Horvatııa quramasy.
Horvatııa nesimen qorqytady?
Kezinde Iýgoslavııa ydyraǵan tusta Horvatııa bólek shyǵa salyp birden sportta úlken jetistikke jetti. Bul eldiń fýtbolshylary men tennısshileri álemdi aýzyna qaratty. Ataǵy jer jarǵan Goran Ivanıshevıch jer betindegi nómiri ekinshi tennısshi edi. «Ýımbldon» jarysyn jeńdi. Mine, odan beri de joǵarǵy deńgeıde óner kórsetken horvatııalyq tennısshiler talaı márte tańdaı qaqtyrtty. Osy kúni Horvatııa quramasyndaǵy 5 tennısshiniń 5-eýi de TOP-50-ge kiredi. Marın Chılıch 2018 jyldy «Aýstralıan oýpen» dodasynyń fınalyna shyǵýmen bastady. Odan beri iri-iri birneshe jarysty utty. Qazir álemniń úshinshi raketkasy.
Astanada ótetin «Prezıdent kýbogy» jarysyn 2010 jyly jeńgen Ivan Dodıg qazir juptasyp óner kórsetýdiń has sheberine aınalǵan. Mysaly, 2015 jyly ol «Roland Garrostyń» juptyq básekesin jeńip alǵan. Taǵy bir tennısshisi Borna Chorıchti horvatııalyq jýrnalıster komanda kapıtany Jelko Kraıannyń óz shákirti bolǵan soń quramaǵa qosyp júr deıdi. Degenmen, Borna jastar arasynda álemniń birinshi raketkasy bolǵanyn eskerer bolsaq, onyń da bizdiń tennısshilerge ońaı qarsylas bolmasyn sezemiz. Nıkola Mektıch pen Vıktor Galovchter de eshkimniń taqııasyna tar kelmeıtin tennısshiler.
P.S
Qos qurama oıyny aldynda jerebe tartý rásimi ótti. Sonymen alǵashqy kezdesýde Marın Chılıch Dmıtrıı Popkomen kezdesse, ekinshi oıynda Borna Chorıch Mıhaıl Kýkshkınmen kúsh synasady. Al odan keıin juptasy básekesi ótedi. Onda Nıkola Mektıch pen Ivan Dodıg jubyna qazaqstandyq Aleksandr Nedovesov pen Tımýr Habıbýllın qarsy turady.
Ermuhamed Máýlen,
«Egemen Qazaqstan»
Varajdın, Horvatııa.